Navoiy viloyatida gazdan noqonuniy foydalanib kelgan issiqxonalar egalariga jinoiy ish qo‘zg‘atilgan. Bu haqda Bosh prokuratura huzuridagi iqtisodiy jinoyatlarga qarshi kurashish departamenti xabar bermoqda.
Ma'lum qilinishicha, Bosh prokuratura huzuridagi departamentning Navoiy shahar bo‘limi tomonidan o‘tkazilgan tergovga qadar tekshiruvda, «I.» va «S.» MChJga tegishli issiqxonalarda gazdan noqonuniy foydalanib kelingani aniqlangan.
Jumladan, «I.» MChJga tegishli issiqxonada o‘rnatilgan elektron gaz hisoblash uskunasini chetlab o‘tib, qo‘lbola usulda tayyorlangan rezina shlang orqali gazdan noqonuniy foydalanib kelganlik holati aniqlangan. Ma'lum bo‘lishicha, bu issiqxona «Navoiy shahargaz» filiali manfaatlariga 357,4 million so‘m zarar yetkazgan.
Shuningdek, Karmana tumanida faoliyat yuritayotgan «S.» MChJga tegishli issiqxona ham o‘rnatilgan elektron gaz hisoblash uskunasini chetlab o‘tib, gazdan noqonuniy foydalanib kelgan. Bu issiqxona «Karmana tumangaz» filiali manfaatlariga 95,9 million so‘m zarar yetkazgan.
Qayd etilishicha, mazkur holatlar yuzasidan jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishlari qo‘zg‘atilib, tergov harakatlari o‘tkazilmoqda.
