Chet tillariga ixtisoslashgan OTMlarga qabul kvotalari 2 baravarga oshiriladi

2021/22 o‘quv yilida xorijiy tillarni o‘qitishga ixtisoslashtirilgan OTMlarga qabul parametrlari 2 baravarga, davlat granti asosida qabul ko‘rsatkichlari esa 3 baravarga oshiriladi.

Foto: fledu.uz

Bu – xorijiy tillarni o‘rganishni ommalashtirish bo‘yicha prezident qarorida belgilandi.

Shuningdek, qarorga asosan, 2022/23 o‘quv yilidan boshlab, xorijiy tillarni o‘qitishga ixtisoslashgan OTMlar bitiruvchilari davlat attestatsiya imtihonlarini topshirishdan tashqari, milliy yoki unga tenglashtirilgan boshqa yetakchi xalqaro baholash tizimlarida ham imtihon topshiradi.

Bunda bitiruvchilarning imtihon topshirish xarajatlari OTM zimmasida bo‘ladi.

2022/23 o‘quv yilidan boshlab, OTMlarning magistratura mutaxassisliklariga hamda oliy ta'limdan keyingi ta'lim ixtisosliklariga tanlovlarda milliy yoki unga mos darajadagi xalqaro sertifikatga ega shaxslar ishtirok etishi tartibi joriy etiladi.

Bunda, filologiya yo‘nalishlari bo‘yicha kamida S1 darajadagi milliy yoki unga mos darajadagi xalqaro sertifikat, nofilologik yo‘nalishlari bo‘yicha esa V2 darajadagi milliy yoki unga mos darajadagi xalqaro sertifikat talab etiladi.

Ushbu qarorga doir boshqa xabarlar:

Chet tillariga ixtisoslashgan 207 ta maktab tashkil etiladi

Xorijiy tillarni o‘rganishni ommalashtirish agentligi tuzildi

Sertifikatga ega chet tili o‘qituvchilarining maoshi oshiriladi

Davlat organlarida chet tili darslari yo‘lga qo‘yiladi. Til bilgan xodimlarga ustama to‘lanadi

Qishloqlarda til o‘rgatuvchi o‘quv markazlari ochish uchun 50 mln so‘mgacha subsidiya beriladi

#OTM #xorijiy til