Bayden Putin bilan uchrashuvida Minskda jurnalistning hibsga olinishini muhokama qiladi

Bayden, shuningdek, Putin bilan Ukraina masalasida ham fikr almashadi. Bu haqda Oq uy rasmiy vakili Jyen Psaki ma'lum qildi, deya xabar bermoqda Reuters.

Eslatib o‘tamiz, 23 may kuni Gretsiya poytaxti Afinadan Litva poytaxti Vilnyusga qarab yo‘lga chiqqan Ryanair aviakompaniyasi samolyoti Belarus hududini tark etishi arafasida ortga qaytarilib, qiruvchi samolyot hamrohligida Minskka majburiy qo‘ndirildi.

Qo‘nishdan so‘ng samolyot bortida bo‘lgan belaruslik muxolifatchi faol Roman Protasevich va uning sevgilisi, Rossiya fuqarosi bo‘lgan Sofiya Sapega hibsga olindi. Protasevich – o‘tgan yili Belarusdagi prezidentlik saylovlaridan keyingi namoyishlarni yoritib borgan NEXTA Telegram-kanalining sobiq bosh muharriri sanaladi.

Rasmiy Minsk, avvaliga, samolyotda go‘yoki bomba o‘rnatilgani haqida G‘azo sektoridagi HAMAS guruhidan xabar olganini bildirdi, HAMAS buni rad etdi. Keyinroq esa Belarus prezidenti Aleksandr Lukashenko samolyotda go‘yoki terrorchi bo‘lgani haqida gapirdi, bu haqda Shveytsariyadan ma'lumot kelganini aytdi, biroq Shveytsariya aviatsiya ma'murlari ham buni rad etdi.

Jo Bayden va Vladimir Putin uchrashuvi 16 iyun kuni Jyenevada bo‘lib o‘tadi.

Rossiya prezidenti hozircha bu voqeaga munosabat bildirmadi. AQSh yetakchisi esa hodisaning ertasiga Belarusning xatti-harakatlarini qoralab, bayonot e'lon qilgan va jurnalistni darhol ozod qilishni talab qilgan. Bayden buni «xalqaro huquqning oyoqosti qilinishi» va «so‘z erkinligiga behayolarcha qilingan hujum» deb atagan.