21:47 / 26.05.2021
16391
Лукашенко Путин ундан узр сўраганини айтди

Россия раҳбари Владимир Путин АҚШ президенти Жо Байден билан Беларусдаги вазиятни мамлакат президенти Александр Лукашенко рухсатисиз муҳокама қилгани учун беларуслик ҳамкасбидан узр сўради. Бу ҳақда Лукашенконинг ўзи Беларусь парламенти аъзолари билан учрашувда маълум қилди.

“Путин бу вазиятда ўзини виждонан тутди. У менга қўнғироқ қилиб, рухсатимсиз Беларусни муҳокама қилгани учун узр сўради. Мен эса унга “Байденга бу ҳақда (Беларус ҳақида) гапирганинг учун сенга раҳмат. Шунинг учун Беларусь ҳақида гапираверишсин, жуда бўлмаса у (Байден) Беларусь қаерда жойлашганини билиб олади”, деб айтган Лукашенко.

Беларусь раҳбари ўз чиқиши давомида Байденни Беларусдаги вазиятдан бехабарликда айблаган. У Россия ва АҚШ етакчилари яқин орада бўлиб ўтадиган ўзаро учрашувда Украина ва Беларусни муҳокама қилмоқчи эканликларини қўшимча қилган. Бироқ, Лукашенконинг фикрича, Беларусь ҳақида яхшиси Минскда гаплашган маъқулроқ ҳисобланади.

“Очиқча таклиф қиламан: агар Беларусь муаммоларини муҳокама қилишмоқчи бўлса, унда давлатимизга келишсин. Швейцарияда ўтириб олиб, Путинга Беларусь муаммоларини ўргатиш – бу кулгили”, деб қўшимча қилган Лукашенко.

Байден ва Путин 16 июнда Швейцариянинг Женева шаҳрида учрашмоқчи. Учрашувда томонлар икки томонлама муносабатларни, стратегик барқарорлик, пандемия муаммоларини ва дунёнинг турли бурчакларидаги ихтилофларни ҳал қилишни муҳокама қилиши кутилмоқда.

Мавзу
Афина-Вильнюс рейси можароси
Минскда Nexta мухолифатчи Telegram-канали собиқ муҳаррири Роман Протасевич қўлга олинди. У учаётган самолёт бомба ҳақидаги хабар туфайли Беларусга фавқулодда қўндирилди. Қўниш ҳақидаги қарорни Лукашенконинг шахсан ўзи «Европани ҳимоя қилиш» учун қабул қилган
Барчаси
Top