Jizzaxlik tadbirkor Gyunel Aliyeva ishi bo‘yicha mashmashalar to‘liq barham topdi

7 may kuni Fuqarolik ishlari bo‘yicha Jizzax tumanlararo sudi da'vogar Gyunel Aliyevaning javobgarlar Qosimjon Husanov va Rustam Ahatovlarga nisbatan oldi-sotdi shartnomasini haqiqiy emas deb topish haqidagi arizasini qanoatlantirdi.

Shuningdek, sud Qosimjon Husanovga nisbatan o‘zboshimchalik bilan qilingan qurilishni buzdirish haqidagi da'vo arizasini ham qanoatlantirdi.

Ya'ni bino auksionda Gyunel Aliyevaga sotib bo‘lingach, uning avvalgi egasi Qosimjon Husanov va Rustam Ahatovlar o‘rtasida 2019 yil 30 dekabr kuni tuzilgan noqonuniy oldi-sotdi shartnomasi sud tomonidan haqiqiy emas, deb topildi. Shuningdek, Qosimjon Husanovga u tomonidan o‘zboshimchalik bilan qurilgan binoning ikkinchi qavatini o‘z hisobidan buzdirish majburiyati yuklandi.

Gyunel Aliyevaning ma'lum qilishicha, sudning mazkur hal qiluv qarori ustidan apellyatsiya shikoyati keltirilmagan va 7 iyun kuni hal qiluv qarori qonuniy kuchga kirgan.

“Avvalambor Kun.uz muxbirlariga, qolaversa Jizzax viloyat prokuroriga, shuningdek viloyat prokuraturasi xodimi Xurshid Muhammadiyevga o‘z minnatdorligimni bildiraman. Ular egilgan, bukilgan adolatni yuzaga chiqarishdi va O‘zbekistonda qonun ustuvorligiga menda ishonch paydo qilishdi. Aynan ularning yordami bilan sud idoralaridagi ikki yillik sarsongarchiligim barham topdi. Bosh prokuraturaga ham o‘z minnatdorligimni bildiraman”, – deydi Aliyeva.

Avvalroq Kun.uz saytida onlayn auksiondan ko‘chmas mulk sotib olib, Jizzaxdagi sudyalarning mantiqsiz qarorlari sabab muammolar girdobiga kirib qolgan tadbirkor ayol Gyunel Aliyevaning huquqlari Oliy sudda tiklangan bo‘lishiga qaramay, Jizzaxdagi sudlarda navbatdagi «ko‘zbo‘yamachiliklar» boshlangani, keyinchalik sudyalar o‘z xatolarini tuzatgani haqida yozilgandi.

Ushbu maqolalardan so‘ng Sudyalar oliy kengashi tomonidan Gyunel Aliyevaga nisbatan nohaqlik qilgan sudyalarga nisbatan xizmat tekshiruvi tayinlangandi.

Mavzuga doir: