Shavkat Mirziyoyev Ibrohim Raisiyni Eron prezidenti etib saylangani bilan tabrikladi

O‘zbekiston prezidenti Shavkat Mirziyoyev Ibrohim Raisiyni Eron Islom Respublikasi prezidenti etib saylangani bilan tabrikladi. Bu haqda O‘zbekiston prezidentining matbuot kotibi Sherzod Asadov xabar qildi.

«Davlatimiz rahbari mamlakatlarimiz o‘rtasidagi ko‘p qirrali hamkorlik do‘st O‘zbekiston va Eron xalqlarining manfaatlari yo‘lida yanada rivojlanishiga ishonch bildirdi», deyiladi xabarda.

Eslatib o‘tamiz, 18 iyun kuni Eronda prezident saylovlarida ovoz berish jarayoni bo‘lib o‘tdi. 

Saylovlarda mamlakatda qabul qilinuvchi qarorlarning maqsadga muvofiqligi bo‘yicha kengash kotibi Muhsin Rizoiy, oliy sud raisi Ibrohim Raisiy, parlament raisi o‘rinbosari Amir Husayn Qozizoda Hoshimiy va markaziy bankning sobiq rahbari Abdulnasr Himmatiy ishtirok etdi. Ibrohim Raisiy 17,6 milliondan ortiq ovoz to‘plagan holda g‘olib bo‘ldi.

Eron prezidenti 4 yillik muddatga saylanadi. Saylovlarda g‘alaba qozonish uchun 50 foizdan ko‘proq ovoz to‘plash lozim. Agar nomzodlardan birortasi bunday natijaga erisha olmasa, unda saylovlarning ikkinchi bosqichi bo‘lib o‘tadi.