Bu yil ixtisoslashtirilgan maktab imtihonlariga mantiqiy savollar ham qo‘shiladi

Prezident, ijod va ixtisoslashtirilgan maktablarni rivojlantirish agentligining Iqtidorli yoshlarni tanlab olish shu'basi rahbari va qabul komissiyasi rahbari o‘rinbosari Sherzod Xudoyqulov agentlikka qarashli 3ta ixtisoslashtirilgan maktabda qabul jarayonlaridagi o‘zgarishlar haqida ma'lumot berdi.

“Imtihon tartibi 3ta ixtisoslashtirilgan maktabda ham bir bosqichli test sinovi shaklida bo‘ladi. Bunda har bitta maktabning o‘z ixtisoslik fanidan kelib chiqqan holda test tuziladi va shu orqali o‘quvchilar saralab olinadi”, – dedi Xudoyqulov 3 iyul kungi matbuot anjumanida.

Uning ta'kidlashicha, bu yilgi imtihonlardagi muhim o‘zgarishlardan biri – test sinovlariga mantiqiy savollarning qo‘shilishi bo‘ladi. Ya'ni har bir maktabda o‘zining ixtisoslik faniga moslashgan mantiqiy savollar test savollariga qo‘shiladi.

Sherzod Xudoyqulov imtihon javoblarining e'lon qilinishiga ham to‘xtaldi. Unga ko‘ra, o‘quvchilar test topshirib bo‘lganlari zahoti o‘z natijalarini ko‘rishlari mumkin bo‘ladi. Imtihonlar tugaganidan keyin qabul komissiyasi barcha o‘quvchilarning ballarini hisoblab chiqib, eng yuqori ball olganlar kesimida qabul kvotasiga ko‘ra qarorini chiqaradi.

Agentlik rahbari Hilola Umarovaning so‘zlariga ko‘ra, bu yil ixtisoslashtirilgan maktablarga olimpiada g‘oliblari imtihonsiz qabul qilinishi mumkin. Bunda olimpiadada 5ta yo‘nalish bo‘yicha yuqori o‘rin olgan o‘quvchilar 10-sinfga qabul qilinadi.