21:19 / 07.07.2021
28342
Жисмоний шахслар ЯТТ сифатида таксичилик қилганда қанча солиқ тўлайди?

Енгил автомобилда йўловчи ташиш фаолияти билан шуғулланувчи ЯТТлар 2021 йилда ойига 150 минг сўм солиқ тўлайди. Шунингдек, лицензия варақаси учун йилига 245 минг сўм давлат божи ундирилади, деб маълум қилди ДСҚ расмий вакили.

Ўзбекистонда 2021 йил 15 майдан бошлаб жисмоний шахсларга таксичилик фаолияти билан шуғулланиш бўйича айрим енгилликлар берилган эди.

Давлат солиқ қўмитаси матбуот котиби Музаффар Назаровнинг сўзларига кўра, бунда жисмоний шахслар “Енгил автотранспорт воситаларида йўловчиларни ташиш” фаолияти билан якка тартибдаги тадбиркор (ЯТТ) сифатида давлат рўйхатидан ўтиши лозим.

2021 йил 1 сентябргача ЯТТ сифатида давлат рўйхатидан ўтганлик учун давлат божи ундирилмайди.

Шу билан бирга, жисмоний шахслар таксичилик қилиши учун лицензия варақаси ҳам олишларига тўғри келади.

“Мазкур фаолият билан шуғулланувчи ЯТТлар республика ҳудудида фаолиятини олиб бориш жойидан қатъи назар, 2021 йил учун ҳар ойлик 150 минг сўм миқдорида қатъий ва белгиланган миқдордаги ижтимоий солиқни тўлайди.

Шунингдек, берилган лицензия варақаси бўйича бир йилга 245 минг сўм миқдорида давлат божи ундирилади”, – деди Солиқ қўмитаси расмийси.

Унинг қўшимча қилишича, ЯТТ сифатида таксичилик фаолияти билан шуғулланувчи жисмоний шахслар машиналарини сариқ рангга бўяшлари шарт эмас, фақатгина автотранспорт воситасининг тепасига “TAXI” белгисини ўрнатиш талаб этилади.

Шунингдек, ЯТТ-таксичиларда таксопаркларга аъзо бўлиш мажбурияти йўқ.

Эслатиб ўтамиз, юқоридаги тартиб президент қарори билан эксперимент тариқасида, 2022 йил 31 декабргача муддатга жорий қилинган.

Қарор билан, такси автомобиллари учун янги талаблар тасдиқланган.

Top