Uzumchilikda ishlatiladigan asbob-uskunalar va texnikalar bojxona to‘lovlaridan ozod etiladi

Prezident Shavkat Mirziyoyevning ma'lum qilishicha, endi shpaler o‘rnatish xarajatlarining 30 foizgacha qismi budjetdan qoplab beriladi, shuningdek, uzumchilikda ishlatiladigan asbob-uskunalar va texnikalar bojxona to‘lovlaridan ozod etiladi.

«J.Xo‘jayev, A.To‘rayev viloyat hokimlari bilan birga, Samarqand (80 gektar), Jizzax (50 gektar), Qashqadaryo (50 gektar) va Toshkent (20 gektar) viloyatlarida yirik ko‘chatchilik komplekslarini barpo etsin.

Bunda, viloyat hokimlari ko‘chatchilik komplekslari barpo qilish uchun yer maydonlarini aniqlab beradi, ularni tashkil qiladigan tadbirkorlarni tanlashga ko‘maklashadi.

Bir oy muddatda uzumning yuqori hosildor, sovuqqa va kasalliklarga chidamli hamda danaksiz yangi navlarini yaratish bo‘yicha Rossiya, Chili va boshqa yetakchi davlatlarning ilmiy tadqiqot markazlari bilan hamkorlikni yo‘lga qo‘yish zarur.

Yil yakuniga qadar Vengriya yetakchi universiteti va Farg‘ona davlat universiteti o‘rtasida soha mutaxassislarini tayyorlaydigan qo‘shma fakultet tashkil etilsin.

Forish (900 gektar), Oltinsoy (330 gektar), Ishtixon (310 gektar) va Yangiobodda (210 gektar) sanoatbop uzum yetishtirish bo‘yicha dastlabki 4ta yirik klaster tashkil etiladi.

Ushbu klasterlarga uzumni qayta ishlash uskunalarini sotib olish xarajatlarining 20 foizi qoplab beriladi. Shuningdek, mayiz quritish va qadoqlash liniyalarini barpo etish xarajatlarining 20 foizigacha subsidiya ajratiladi.

Bundan buyon, yetishtirilgan hosilning 30 foizi eksport qilinsa, daromad va mulk soliqlari 30 foizga, eksport 30 foizdan oshsa, 2 baravarga kamaytiriladi.

Berilgan topshiriqlarning joylarda bajarilishi, loyiha ofislari ishini yo‘lga qo‘yish viloyat hokimining investitsiyalar bo‘yicha o‘rinbosarlariga yuklatiladi», deya davlat rahbarining so‘zlarini keltirmoqda Kun.uz muxbiri.