Umumiy ovqatlanish shoxobchalari ish vaqtiga cheklovlar amal qilishi davom etadi

Sog‘liqni saqlash vazirligi O‘zbekistonda 28 iyundan joriy etilgan qo‘shimcha cheklov choralari doirasida kafe, restoran va boshqa ko‘ngilochar muassasalarning ish faoliyatiga o‘rnatilgan cheklovlar 12 iyuldan keyin ham amalda bo‘lishini ma'lum qildi.

«Respublika maxsus komissiyasi tomonidan bir qator cheklovlar bilan birga kafe, restoran va boshqa ko‘ngilochar muassasalarning 08:00dan 20:00gacha ishlashiga ruxsat berilgan edi. 

Mazkur holat yuzasidan Sog‘liqni saqlash vazirligi shuni ma'lum qiladiki, ushbu tartiblar Respublika maxsus komissiyasi tomonidan ma'lum bir muddat uchun qabul qilingan emas, ya'ni epidemiologik vaziyat barqarorlashganda ushbu cheklovlar bekor qilinadi. Ammo hozirda ularga hech qanday o‘zgarish kiritilmagan.

Agar karantin qoidalariga oid biror o‘zgarish kiritilsa, buni Sog‘liqni saqlash vazirligi rasmiy sahifalari orqali e'lon qilinadi», deyiladi SSV xabarida.

Eslatib o‘tamiz, maxsus komissiyaning 25 iyun kungi qarorida 28 iyundan 12 iyulga qadar Toshkent shahriga qo‘shni viloyatlardan avtotransport (avtobus, avtomobil) vositalari orqali o‘ta zarurat bo‘lmagan hollarda kirish bo‘yicha cheklovlar o‘rnatilgani ma'lum qilingandi. Ammo amalda bu choralarga rioya etilmadi - Toshkent shahriga kirish 28 iyundan beri erkin bo‘lib qolmoqda.

Shuningdek, 28 iyundan respublika bo‘ylab ko‘ngilochar obektlar – restoran, tungi klublar, diskoteka, karaoke, bilyard zallari va kompyuter o‘yinlari markazlari hamda umumiy ovqatlanish obektlari – kafe, oshxona, choyxonalar ishlashiga soat 8:00dan 20:00gacha ruxsat berilishi, ko‘ngilochar va umumiy ovqatlanish obektlarida tashrif buyuruvchilarga ushbu muassasalar umumiy sig‘imining 50 foizidan qat'iy oshirmagan holda xizmat ko‘rsatish belgilangan, bu cheklovlar qachongacha amal qilishi aniq ko‘rsatilmagandi.