Jahongir Ortiqxo‘jayev koronavirusga qarshi emlangani xabar qilindi. Savolli masalaga oydinlik kiritildi

Toshkent shahar hokimi Jahongir Ortiqxo‘jayev 17 iyul kuni koronavirusga qarshi o‘zbek-xitoy vaksinasi bilan emlandi, deb xabar berdi hokimlik matbuot xizmati.

Emlash jarayonidan e'lon qilingan videodagi bir holat ijtimoiy tarmoqlarda tanqidiy muhokamalarni keltirib chiqardi.

Gap shundaki, dastlabki lavhada vaksina ko‘k rangli igna orqali shpritsga tortib olingani, ammo hokimning yelkasiga vaksinani kiritishda qoramtir-kulrang rangli ignadan foydalanilgani ko‘rinadi.

Kun.uz hokimlik matbuot xizmatidan videoning montaj qilinmagan talqinini taqdim etishni so‘radi. Undan ko‘rinishicha, vaksinani shpritsga olish va uni emlanayotgan shaxsga kiritishda turli ignalardan foydalanilgan.

Toshkent shahar hokimligi matbuot xizmati vakili Dilfuza Rasulovaning Kun.uz'ga ma'lum qilishicha, vaksina ignasi dorini tortish uchun torlik qiladi, shuning uchun boshqa igna bilan tortiladi.

“Hokim yelkasida ignaning qopqog‘idek ko‘ringan narsa – shpritsning “uplotnitel” deb ataluvchi qismi. Bu yerda ignalarning biri ko‘k, ikkinchisi shaffof “uplotnitel”, – dedi Dilfuza Rasulova.

Jahongir Ortiqxo‘jayevning so‘zlariga ko‘ra, u o‘zbek-xitoy vaksinasining ikkinchi dozasini qabul qilgan. Eslatib o‘tamiz, ushbu vaksinaning to‘la kursi uchta doza qabul qilishni nazarda tutadi.