Armen Lashet matbuot anjumanida o‘zini nomunosib tutganligi uchun tanqid qilindi

Ushbu holat videosi Twitter ijtimoiy tarmog‘ida e'lon qilingach, siyosatchi noo‘rin kulgusi uchun tanqid qilina boshlangan.

Ta'kidlanishicha, Lashet toshqinlardan eng ko‘p jabr ko‘rgan federal yerlardan biri - Shimoliy Reyn-Vestfaliya rahbari hisoblanadi. 17 iyulda Shtaynmayyer u yerga tabiiy ofatning vayronkor oqibatlarini muhokama qilgani kelgan.

“Bu holatdan tilim aylanmay qoldi”, deb yozgan Twitter’da Germaniya Sotsial-demokratik partiyasi bosh kotibi Lars Klingbayl Lashetning kulgusiga izoh berib. Boshqa siyosatchilar Lashetdan darhol uzr so‘rashni talab qilishgan.

Ijtimoiy tarmoqlar foydalanuvchilari Xristian-demokratik ittifoq yetakchisini tanqid qilib, #Laschetlacht (Lashet kulmoqda) xeshtegini ishga tushirishgan. Unga, shuningdek, niqobsiz bo‘lgani va ijtimoiy masofaga amal qilmagani eslatib qo‘yilgan. 

Keyinroq siyosatchining o‘zi noo‘rin ishi uchun uzr so‘ragan. U Twitter’da post e'lon qilib, unda prezidentga tashrifi uchun minnatdorlik bildirgan va ushbu holatda o‘zi haqida yomon taassurot qoldirganidan afsusdaligini aytgan.

Yakunlanayotgan haftada Germaniyaning g‘arbiy va janubi-g‘arbiy qismlarida kuchli yomg‘irlar yog‘di. Buning oqibatida daryolar o‘zanidan chiqib, toshqinlarga va ko‘plab qurbonlarga olib keldi. Shuningdek, mingdan ortiq odam bedarak yo‘qolgan.