Koronadayjest: Tokioda kasallangan olimpiyachilarni sanashmoqda, Janubi-Sharqiy Osiyo uchun og‘iri oldinda

Tokioda Olimpiya o‘yinlari ochilishi arafasida olimpiya qishlog‘ida test qilingan sportchilarning yana bir nafarida Covid-19 tasdiqlandi, ammo XOQ vakillari va Olimpiada tashkilotchilari vaziyat nazorat ostida ekani va infeksiya avj olishi ro‘y bermasligiga ishontirmoqda.

Bu vaqtda Angliyada koronavirus cheklovlari bekor qilinganini bayram qilishmoqda, holbuki mamlakatda yangi kasallanish holatlari soni yana orta boshlagan. Saudiya Arabistonida haj marosimlari davom etmoqda, unda faqat emlangan saudiyaliklar qatnashishiga ruxsat etilgan. BBC so‘nggi koronaxabarlarni taqdim etdi.

Tokioda barchasi tayyor

Tokiodagi Olimpiya o‘yinlari ochilishi arafasida olimpiya qishlog‘ida virus yuqtirib olgan to‘rtinchi sportchi aniqlandi, bu safar Chexiya plyaj voleybol jamoasi a'zosining koronavirusga topshirgan testi musbat natija bergan.

Yangi holatga qaramay (avvalroq janubiy afrikalik futbolchilar va ushbu mamlakat delegatsiyasining sport musobaqalarida ishtirok etmaydigan bir vakilida koronavirus tasdiqlangandi), turnir tashkilotchilari olimpiya qishlog‘ida epidemiologik vaziyat barqarorligicha qolayotganini aytishmoqda.

O‘z navbatida, Olimpiadaning rasmiy vakili Masa Takaya o‘yinlar o‘tkazilishiga bilvosita aloqador bo‘lgan odamlardan olingan minglab tahlillardan jami 61ta kasallanish holati tasdiqlanganini, bu esa umumiy holatda juda past ko‘rsatkich ekanini qayd etgan (Olimpiadada 20 ming atrofida sportchi qatnashadi).

Xalqaro olimpiya qo‘mitasiga tavsiyalar beruvchi mustaqil ekspertlar guruhi raisi ham xavfsizlik bo‘yicha tizim ish berishiga ishonch bildirmoqda.

«Kasallanganlar soni juda kam. Kutilganidan ancha pastligi aniq. Bundan tashqari, ko‘rilgan choralar infeksiya tarqalishi xavfini kamaytirishi kerak», deya qayd etgan Brayan Makkloski.

Barcha sportchilar har kuni tekshiruvdan o‘tadi, ularga ijtimoiy masofa saqlashga rioya etish va musobaqalarda ishtirok etayotgan, ovqatlanayotgan va uxlayotgan vaqtlaridan tashqari barcha holatlarda tibbiy niqobda bo‘lish ko‘rsatma qilingan.

So‘rovlarning ko‘rsatishicha, yaponiyaliklarning aksar qismi mamlakatda hozirgi sharoitlarda Olimpiada o‘tkazilishiga qarshi bo‘lishgan. Hatto o‘yinlar homiysi bo‘lgan Toyota kompaniyasi Olimpiya o‘yinlari bilan bog‘liq televizion reklamalarni namoyish etmaslikka qaror qilgan, kompaniya rahbariyati ochilish marosimida ishtirok etmaydi.

Ozodlik kuni
Angliyada yakshanbadan dushanbaga o‘tar kechasi amalda barcha karantin choralari bekor bo‘ldi, jumladan endi yopiq binolarda niqob taqish majburiy emas, ko‘ngilochar maskanlar, bar va restoranlarga tashrif buyuruvchilar soni cheklanmaydi, shuningdek, ko‘pchilik bo‘lib bir joyda to‘planish bo‘yicha taqiq o‘z kuchini yo‘qotdi.

Cheklovlar bekor bo‘lishi arafasida trenajyor zallari, stadionlar, kinoteatrlar va tungi klublar mijozlarning katta oqimiga tayyorgarlik ko‘rdi. Ayrim tungi klublarda oqshomlar o‘tgan tundayoq boshlanib ketgandi.

Shu bilan birga, mamlakatda o‘tgan safargi yengilliklardan keyin kasallanish holatlari soni o‘sa boshlagandi va hozirda kuniga 50 ming atrofida yangi holatlar qayd etilmoqda.

Britaniya kasallanish holatlari soni (5,4 mln) va koronavirus qurbonlari soni bo‘yicha (129 ming) dunyo reytingida yettinchi o‘rinda, prognozlarga ko‘ra, tez orada kunlik holatlar soni yil boshida kuzatilgan ikkinchi to‘lqinning pik davriga (kuniga 70-80 ming holat) qaytadi.

O‘z navbatida, Britaniya vaksinatsiya bo‘yicha Yevropaning boshqa davlatlarini ortda qoldirmoqda - bu yerda katta yoshli aholining 87 foizi kamida bir doza, 68 foizi esa ikki dozani ham qabul qilgan.

Saralanganlar uchun haj va ziyoratchilarga suv tarqatayotgan robotlar

Odatda har haj mavsumida Makkaga butun dunyodan ikki yarim million ziyoratchi tashrif buyurardi, ammo bu safar koronavirus tarqalishi xavfi sabab kuchli cheklovlar joriy etilgan.

Bu yili hajda faqat 60 ming kishi ishtirok etishiga ruxsat berilgan - barchasi Saudiya Arabistonining 18 yoshdan 65 yoshgacha bo‘lgan fuqarolari yoki rezidentlari - to‘liq emlangan va xronologik kasalliklari bo‘lmaganlar haj qilishi mumkin.

Hajni tashkillashtirish va o‘tkazish Saudiya Arabistoni podshohligi boshqaruvidagi sulola obro‘yini belgilab beradigan omillardan hisoblanadi. Shu tufayli xorijlik ziyoratchilarga ruxsat berilmasligi Ka'baga kelish istagida bo‘lgan xorijliklarning hafsalasini pir qilgan.

Saudiya Arabistoni o‘tgan yilgi muvaffaqiyatlarini qaytarmoqchi, o‘shanda 10 ming kishi hajda ishtirok etgan, birorta koronavirusga chalinish holati qayd etilmagandi.

Muqaddas joyni kasallik o‘chog‘iga aylantirmaslik uchun hukumat ziyoratchilarni 20 kishilik kichik guruhlarga bo‘lishga qaror qilgan. Ularga «smart-haj-karta»lar taqdim etilgan, bu mehmonxona yoki yotoqxonalar, ziyoratchilarni muqaddas joylarga eltuvchi avtobuslardan kontaksiz foydalanish imkonini beradi.

Shuningdek, Zam-zam bulog‘i suvini robotlar tarqatishi ko‘zda tutilgan.

Boshqalar-chi?
Angliya kovid cheklovlari bekor qilinishini nishonlayotgan mahalda sog‘liqni saqlash sohasida mustaqil siyosat yuritish huquqiga ega bo‘lgan Shotlandiya va Uels hukumatlari hozircha qator cheklovlar saqlab qolinishini, jumladan, yopiq jamoat binolarida tibbiy niqobda bo‘lish majburiyligini ma'lum qildi.

Yevropaning ayrim mamlakatlari, xususan Ispaniya va Gretsiya infeksiya yana kuchayishi fonida qator cheklovlarni qaytadan joriy etishga majbur bo‘lmoqda.

Janubiy-Sharqiy Osiyo mamlakatlari uchun esa hali barchasi oldinda bo‘lishi mumkin.

Hozirda mintaqadagi asosiy o‘choqlardan biri Indoneziya bo‘lib turibdi, bu mamlakatda kuniga o‘rtacha 1,2-1,3 ming o‘lim qayd etilmoqda.

Dushanba kuni Xanoyda qisman lokdaun joriy etildi, Vetnam janubidagi millionlab kishilarga uyni tark etish taqiqlandi.

Tibbiyot xodimlarining harbiy xuntaga qarshi norozilik sifatida uzoq muddatli ish tashlashi tufayli Myanmada shifoxonalar ishlamay yo‘qgan, ko‘ngillilar uyma-uy yurib koronavirusdan vafot etganlarning jasadlarini yig‘ishga majbur bo‘lmoqda.

AQShda ham vaziyat yomonlasha boshladi. Katta yoshli aholining katta qismi vaksinaning kamida birinchi dozasini qabul qilganiga va oylar davomida infeksiya tarqalishi faqat pasayib kelganiga qaramay, so‘nggi ikki haftada yangi holatlar ko‘paya boshladi.

Kasallik keskin o‘sishi qayd etilgan Los-Anjyelesda majburiy niqob rejimi tiklangan, yakshanba kuni AQSh bosh sanitar vrachi boshqa shaharlar ham shunday qaror qabul qilishiga to‘g‘ri kelishi haqida ogohlantirgan.