19:39 / 27.07.2021
10013
Спортчи-абитуриентларнинг мурожаатларидан сўнг уларга истисно тариқасида имтиёзлар берилди

Охирги уч йилда Осиё ва республика чемпионатларида совриндор бўлиб, бу йил “Спорт фаолияти” ва “Жисмоний маданият” йўналишларига ҳужжат топширган спортчи-ўқувчилар тестлардан озод этилиб, имтиҳонсиз максимал балл оладиган бўлди. Улар умумий танловдан ташқари талабаликка қабул қилинади.

Спорт мусобақаларида совринли ўринларни қўлга киритган спортчи-ўқувчилар ва ота-оналарнинг мурожаатлари инобатга олиниб, уларга ОТМга кириш имтиҳонларида истисно тариқасидаги қўшимча имтиёзлар белгиланди.

Бу ҳақда Давлат қабул комиссиясининг 2-сон баёнида қайд этилган, деб маълум қилди Олий ва ўрта махсус таълим вазирлиги.

Қайд этилишича, Осиё ва республика чемпионатларида охирги уч йилда ғолиб ва совриндор бўлган ҳамда жорий йилда фақат “Спорт фаолияти” ва “Жисмоний маданият” йўналишларига ҳужжат топширган спортчи-ўқувчиларга истисно тариқасида қуйидаги имтиёзлар белгиланди:

— иккинчи мутахассислик фани (умумий жисмоний тайёргарликни назарда тутган ҳолда) ҳамда мажбурий учта фанлар бўйича тест синовларидан озод этган ҳолда максимал балл берилади;

— кириш имтиҳонлари (касбий (ижодий) имтиҳон) натижаларига кўра, ушбу тоифадаги абитуриентларнинг тўплаган балларига мувофиқ, улар умумий танловдан ташқари давлат гранти ва тўлов-контракт асосида талабаликка қабул қилинади. Бунда, кириш имтиҳонлари (касбий (ижодий) имтиҳон) натижаларига кўра, ушбу тоифадаги абитуриентларни давлат гранти ва тўлов-контракт асосида талабаликка қабул қилиш учун минимал ўтиш бали Давлат комиссиясининг қарорига мувофиқ белгиланади;

“Спорт фаолияти” ва “Жисмоний маданият” бакалавриат таълим йўналишлари бўйича ўқишга кириш учун онлайн рўйхатдан ўтиш жараёнида мазкур бакалавриат таълим йўналишларининг сиртқи таълим шаклини танлаган ушбу тоифадаги абитуриентлар кириш имтиҳонлари (касбий (ижодий) имтиҳон) натижаларига кўра фақат тўлов-контракт асосида талабаликка тавсия этилиши мумкин;

“Жисмоний маданият” бакалавриат таълим йўналиши бўйича ўқишга кириш учун онлайн рўйхатдан ўтган ушбу тоифадаги абитуриентларга совринли ўринлар қўлга киритилган спорт турларининг хусусиятидан келиб чиқиб, Ўзбекистон давлат жисмоний тарбия ва спорт университетининг “Спорт фаолияти” бакалавриат таълим йўналишининг спорт турлари бўйича тузилган фан дастурлари асосида биринчи мутахассислик фани бўйича кириш имтиҳонлари (касбий (ижодий) имтиҳон) ўтказилади;

— совринли ўринлар қўлга киритилган спорт турларининг хусусиятидан келиб чиқиб, биринчи мутахассислик фани бўйича касбий (ижодий) имтиҳон ОТМ профессор-ўқитувчилари, тегишли спорт федерациялари, Туризм ва спорт вазирлиги ҳамда Олий ва ўрта махсус таълим вазирлиги вакилларидан иборат бўлган таркибда тузиладиган имтиҳон комиссияси томонидан онлайн видеотрансляция қилинган ҳолда белгиланган муддатларда ўтказилади.

Республика олий таълим кенгаши аъзоси Хушнудбек Худойбердиевнинг аниқлик киритишича, спортчи-абитуриентларга йўналишини ўзгартириш имконияти берилади.

“Яъни бошқа йўналишга онлайн рўйхатдан ўтган абитуриентлар ўзлари рози бўлса, имтиёз бериладиган “Спорт фаолияти (фаолият турлари бўйича)” ва “Жисмоний маданият” бакалавриат таълим йўналишларига ўзгартира олади”, дея маълум қилди у Telegram-каналида.

Top