19:45 / 28.07.2021
7584
МСК президент сайлови логотипини тақдим этди

Ўзбекистон Марказий сайлов комиссияси 2021 йилги президент сайлови логотипини тақдим этди. Маълум қилинишича, логотип устида 3 ой ишланган.

Сайлов логотипини яратишда махсус гуруҳ 3 ой давомида иш олиб борди, якуний кўриниши 16 та вариант ичидан танлаб олинди, деб маълум қилди МСК матбуот маркази раҳбари Санжар Рашидов.

Гуруҳга мамлакатдаги барча қатламга мансуб аҳоли вакиллари ва олимлар, психологлар, санъатшунослар, социологлар жалб қилингани, халқаро тадқиқотчилар ва экспертларнинг ҳам хулосалари олингани айтилди.

Логотипнинг лотинча вариантида "oktabr" ва "2021-yil" сўзлари хато ёзилгани ижтимоий тармоқларда танқидларга сабаб бўлди.

“Дунё тажрибаси, хусусан, Россия, АҚШ, Франция, Корея Республикаси сингари мамлакатларнинг сайлов ўтказиш борасидаги амалиёти ўрганилганида маълум бўлдики, ривожланган мамлакатларнинг аксарияти ўз сайлов кампаниясини ўтказиш чоғида фойдаланадиган логотипида учта жиҳат бўлишига алоҳида аҳамият қаратар экан. Булар – муайян сана, ҳамма учун бир хилда тушунарли рамз, давлат байроғининг ранги.

Асосийси, логотип ўзи билан зарур информацияни “ташиши” керак”, – деди Санжар Рашидов.

Эслатиб ўтамиз, Ўзбекистон Республикаси президенти сайловига 23 июль куни старт берилди.

Мавзу
Сайлов-2021
Сайлов қонунчилигига киритилган ўзгартишларга кўра сайловлар октябр ойи учинчи ўн кунлигининг биринчи якшанбасида ўтказилиши белгиланди. 2021 йилги президентлик сайлови 24 октябрга тўғри келмоқда.
Барчаси
Top