20:08 / 05.08.2021
1027
Қаршида енгил конструкцияли дўкон ўрнатиш учун жой олган шахс дарахтларни кесиб қурилиш қилгани маълум бўлди

Ижтимоий тармоқларда Қарши шаҳар «Чақар» МФЙ ҳудудидаги Насаф ва Қизилмачит кўчалари чорраҳасида савдо дўкони ва ҳунармандчилик павильонлари қурилиши оқибатида мораторийга тушган кўп йиллик дарахтлар ўзбошимчалик билан кесиб ташлангани ҳақида хабарлар тарқалди. Ҳолат Қашқадарё вилояти Экология ва атроф-муҳитни муҳофаза қилиш бошқармаси томонидан ўрганилган.

Ўрганиш давомида маълум бўлишича, Қарши шаҳар қурилиш бўлими бошлиғи вазифасини вақтинча бажарувчи Жаҳонгир Ҳазратов томонидан 2021 йил 30 апрел санасида фуқаро Б.О.га Қарши шаҳар «Чақар» МФЙ, Насаф ва Қизилмачит кўчалари чорраҳасидан 18X6 ўлчамдаги 108, метр квадрат ер майдонига вақтинчалик муддатга енгил типдаги савдо павильони (савдо дўкони) ва ҳунармандчилик (этикдўзлик) павильони ўрнатиш учун MR-2 сонли рухсатнома берилган.

Фуқаро Б.О. мазкур рухсатнома талабларига зид равишда енгил типдаги павильон ўрнатиш ўрнига ўзига вақтинчалик ажратилган ҳудудда қонунларга зид равишда қурилиш ишларини бошлаб юборган.

Қайд этилишича, фуқаро Б.О. қурилиш жараёнида экология ва атроф-муҳит соҳасидаги қонунчилик талабларига ҳам риоя қилмаган. Хусусан, «Экологик экспертизаси тўғрисида»ги қонун ҳамда Вазирлар Маҳкамасининг 2020 йил 7 сентябрдаги «Атроф-муҳитга таъсирни баҳолаш механизмини янада такомиллаштириш тўғрисида»ги 541-сонли қарорларида белгиланган талабларни бузган.

Ўрнатилган тартибга кўра, фуқаро Б.О. қурилиш режалаштирилаётган ҳудудидаги дарахтларни кесиш учун ДХМга ариза билан мурожаат қилиши ва мурожаати Экология ва атроф-муҳитни муҳофаза қилиш бошқармаси томонидан ўрганилиб, дарахтнинг кесиш ёки кесилмаслиги бўйича берилган хулосага қараб иш тутиши лозим эди. Аммо фуқаро бундай қилмаган ва ўзбошимчалик билан дарахтларни кесган ва қурилиш қилган.

Таъкидланишича, фуқаро Б.О. томонидан дарахтлар кесилаётгани ҳақидаги мурожаат вилоят Экология ва атроф-муҳитни муҳофаза қилиш бошқармасига жорий йил 3 август куни келиб тушган. Масъул ходимлар томонидан ҳолат бориб ўрганилганда, ҳудудда жами 5 дона дарахт ноқонуний кесилганлиги аниқланган. Мазкур қонунбузилиш ҳолати юзасидан фуқарога нисбатан МЖтКнинг 79-моддаси 1-қисми билан маъмурий баённома расмийлаштирилиб, табиатга етказилган зарар 45 миллион 325 минг сўм ҳисобланган ва БҲМнинг беш баробари миқдорида жарима қўлланган.

Top