Adliya vazirligi ishlab chiqqan qonun loyihasida, shuningdek, avtomobil salonining old qismiga monitor (displey) o‘rnatganlik uchun jarimani bekor qilish ham nazarda tutilgan.
Adliya vazirligi transport vositalari haydovchilariga qulayliklar yaratish uchun qonun loyihasi ishlab chiqdi.
Jamoatchilik muhokamasiga qo‘yilgan loyihada quyidagilar taklif etilmoqda:
— haydovchilarga transport vositasini boshqarayotganda qo‘llarini ishlatmasdan muloqot qilish imkonini beruvchi minigarnituralar va boshqa texnik qurilmalar orqali telefondan foydalanish huquqini berish;
— transport vositasini boshqarayotganda telefondan foydalanish huquqbuzarligini jazo qo‘llanilgandan so‘ng bir yil davomida takroran sodir etilgandagi kuchaytirilgan javobgarlik chorasini bekor qilish;
— avtomobil salonining old qismiga monitor (displey) o‘rnatganlik uchun ma'muriy javobgarlikni bekor qilish;
— haydovchilarga, agarda ularning O‘zbekiston Respublikasida berilgan biometrik pasporti yoki ID-kartasi yonida bo‘lsa, transport vositalarini boshqarish huquqini beruvchi hujjatlarni, texpasportni, sug‘urta polisini yonida olib yurmasdan transport vositasini boshqarish huquqini berish (Bunda, ushbu hujjatlar mavjudligi DYHXX xodimi tomonidan elektron tizim orqali transport vositasi to‘xtatilgan joyda mustaqil tekshiriladi; mazkur yangilikni amaliyotga joriy qilish maqsadida Ichki ishlar vazirligiga kerakli integratsiya ishlarini 2021 yil 1 dekabrga qadar yakunlash vazifasi yuklatilishi mumkin);
— harakat tezligini o‘lchashda, tezlikni o‘lchaydigan maxsus qurilmalar tomonidan qayd etilgan tezlik ko‘rsatkichlaridan qurilmalar tomonidan yo‘l qo‘yilishi mumkin bo‘lgan soatiga 5 kilometrlik nuqsonni ayirib tashlash bo‘yicha qoida joriy etish.
NHHLM portalida qonun loyihasi muhokamasi 24 avgustgacha davom etadi.
Loyihadan yana bir necha turdagi ma'muriy jarimalar summasini kamaytirish takliflari ham o‘rin olgan.
