Bosh prokuratura Surxondaryoda samolyotlar to‘qnashib ketgani haqidagi bayonotini rad etdi

Dastlabki bayonotda bortida jami 585 nafar afg‘on harbiysi bo‘lgan 22 ta harbiy samolyot va 24 ta harbiy vertolyot O‘zbekistonga noqonuniy kirib kelgani, bu jarayonda Afg‘onistonning “Embrayyer-314” samolyoti O‘zbekistonning “MiG-29” rusumli samolyoti bilan to‘qnashib ketgani, holat bo‘yicha bevosita bosh prokuror tomonidan jinoyat ishi ochilgani ma'lum qilingandi.

Rasmiy raddiyada aytilishicha, bular “oxirigacha aniqlashtirilmagan” ma'lumotlar bo‘lgan.

“Qayd etish kerakki, hozirda Afg‘onistonda ro‘y berayotgan o‘zgarishlar dunyo hamjamiyati diqqat markazida turibdi. To‘lqinli voqeliklar tufayli aksariyat odamlarda turli-tuman tushunchalar shakllanib kelmoqda.

Tan olish zarur, har doim ham bunday vaqtda rasmiy manbalar ham ayrim kamchiliklar, ya'ni axborot tarqatishdagi adashmovchiliklar, tekshirilmagan dalillar yuzasidan ma'lumot berib yuborishi ehtimoldan xoli emas.

Shu tarzda, Bosh prokuraturaning Telegram-kanalida chop etilgan bayonot ham oxirigacha aniqlashtirilmay, mutasaddi idoralarning rasmiy tekshirilgan ma'lumotlariga tayanmagan holda chiqarilgan.

Shu bois, Bosh prokuraturaning Telegram-kanaliga ma'lumotlarni joylashtirish uchun mas'ul bo‘lgan tarmoq xodimlari shoshma-shosharlik bilan chiqarilgan mazkur bayonot uchun rasman uzr so‘rashmoqda.

Kelgusida bunday holatlarga yo‘l qo‘yilmaslik uchun tegishli choralar ko‘rildi”, – deyiladi Bosh prokuratura axborotida.

Kun.uz birlamchi axborotdagi aynan qaysi ma'lumotlar xato bo‘lganiga izoh so‘rab, Bosh prokuratura matbuot xizmati rahbari Hayot Shamsutdinov bilan bog‘landi. U berilgan ma'lumotlarning hammasi xato bo‘lganini bildirdi.

Voqealar aslida qanday bo‘lgani haqida tekshirilgan va to‘g‘ri ma'lumot beriladimi, degan savolga javoban Hayot Shamsutdinov hozircha bu mavzuda qo‘shimcha ma'lumot berilishi kutilmayotganini ma'lum qildi.

Eslatib o‘tamiz, “Tolibon” harakati Afg‘onistonni egallagach, Surxondaryoning Sherobod tumanida noma'lum sabablarga ko‘ra Afg‘oniston harbiy havo kuchlariga qarashli samolyot qulab tushgan edi. Bu haqda internetda foto va videolar tarqalgandi. Keyinchalik Bosh prokuratura bergan, ayni paytda xato deyilayotgan xabarda esa afg‘on samolyoti O‘zbekiston harbiy samolyoti bilan to‘qnashgani aytilgandi.

Mudofaa vazirligi matbuot xizmati Kun.uz savoliga javoban ayni paytda vazirlik vakillari voqea joyida o‘rganishlar olib borayotgani va tez orada bu haqda aniq ma'lumot berilishini ma'lum qilgan edi.

16 avgust kuni, shuningdek, bortida afg‘on harbiylari bo‘lgan ikkita vertolyot O‘zbekiston hududidagi paxta dalasiga qo‘ngani aks etgan video paydo bo‘ldi.