Afg‘oniston xalqaro moliyaviy yordamdan mahrum etildi

BBC News’ning xabar berishicha, jamg‘arma iqtisodiy inqirozga qarshi global kurash doirasida 23 avgustda Afg‘onistonga 370 mln dollardan ko‘proq mablag‘ o‘tkazib berishi kerak edi. Biroq toliblar hokimiyatni egallagach, Afg‘onistonning xalqaro yordam olishi cheklandi.

XVJ matbuot kotibining ta'kidlashicha, bu xalqaro hamjamiyatda Afg‘onistonda toliblar hukumatining tan olinishi borasida oydinlik yo‘qligi sababli yuz bergan. “Har doimgidek XVJ xalqaro hamjamiyat fikriga ko‘ra ish tutadi”, deb aytgan jamg‘arma vakili.

Ushbu chora AQSh prezidenti Jo Bayden ma'muriyati AQSh markaziy bankining Afg‘onistonga tegishli birorta ham aktivi toliblarga berilmasligini ma'lum qilgandan keyin ko‘rilgan. Bundan tashqari, AQSh kongressi a'zolari moliya vaziri Janet Yyellenga yo‘llagan maktublarida toliblar AQShdan yordam olmasligiga kafolat berilishini talab qilishgan.

Avvalroq Afg‘oniston markaziy banki rahbari Vashington Afg‘onistonning AQSh Federal zaxira tizimida saqlanuvchi 7 milliard dollarlik aktivlarini muzlatib qo‘yganini ma'lum qilgan. Afg‘oniston prezidentining iqtisodiy masalalar bo‘yicha maslahatchisi Ajmal Ahmadiy o‘tgan hafta Afg‘onistonning Da Afghanistan banki umumiy zaxiralari 9 mlrd dollarni tashkil qilganini ma'lum qilgan. Uning ta'kidlashicha, xalqaro standartlarga ko‘ra, ushbu aktivlarning katta qismi AQSh g‘aznachilik obligatsiyalarida yoki ofshorlarda oltinda saqlanadi. 

XVJ avval ham boshqa davlatlardagi tuzumlarga qarshi shunday cheklovlar kiritgan.