19:26 / 23.08.2021
8315
Шавкат Мирзиёев КХШТ саммитида меҳмон сифатида иштирок этди

Ўзбекистон Республикаси президенти Шавкат Мирзиёев 23 август куни Коллектив хавфсизлик шартномаси ташкилотининг Афғонистондаги вазиятга бағишлаб видеоанжуман шаклида ўтказилган навбатдан ташқари сессиясида таклиф этилган меҳмон сифатида иштирок этди.

Тожикистон Республикаси президенти Имомали Раҳмон раислигида ўтган йиғилишда Россия Федерацияси президенти Владимир Путин, Беларусь Республикаси президенти Александр Лукашенко, Қозоғистон Республикаси президенти Қосим-Жўмарт Тўқаев, Қирғизистон Республикаси президенти Садир Жапаров, Арманистон Республикаси бош вазири Никол Пашинян ва КХШТ бош котиби Станислав Зась қатнашди.

Сессияда қўшни Афғонистонда юзага келаётган вазият ҳамда минтақадаги барқарорликка таҳдид солаётган хавф-хатарларга қарши кўрилаётган чора-тадбирлар юзасидан батафсил фикр алмашилди.

Ўзбекистон президенти учрашув иштирокчиларини минтақавий хавфсизликни таъминлашга кўмаклашиш, шу жумладан Афғонистон билан давлат чегарасини ишончли қўриқлаш ва ҳимоя қилиш борасида олиб борилаётган тадбирлар тўғрисида хабардор қилди.

«Мамлакатимиз етакчиси минтақа давлатларининг алоқадор тузилмалари билан Афғонистон борасида самарали ҳамкорлик ва тезкор ахборот алмашинуви йўлга қўйилганини мамнуният билан қайд этди.

Саммит якунида минтақадаги вазият юзасидан ўзаро маслаҳатлашувлар ва мунтазам ахборот алмашишни давом эттиришга келишиб олинди», дейилади президент матбуот хизмати хабарида.

Мавзу
АҚШнинг Афғонистондан кетиши
АҚШ Афғонистонда 20 йил давом этган ҳарбий кампаниясини тамомламоқда. Толиблар эса мамлакат ҳудудларини бирин-кетин эгаллаб олмоқда.
Барчаси
Top