Qashqadaryoda sevgan qizining erini pichoqlab o‘ldirgan yigit va uning sherigiga sud hukmi o‘qildi

Qashqadaryo viloyati Qarshi tumanida sevgan qizining sobiq erini pichoqlab o‘ldirgan yigit va uning sherigiga sud hukmi o‘qilgan. Bu haqda Oliy Sud matbuot xizmati xabar bermoqda.

Ma'lum qilinishicha, Qarshi tumanida yashovchi Sh.M. bir necha yil avval Nishon tumanida yashovchi N.B. bilan tanishgan. Ular bir-birini yoqtirib qolib, oila qurishga qaror qilgan. Bu orada Sh.M. ishlash xorijga ketgan va N.B.ni uydagilari qo‘shni tumanda yashovchi qarindoshlarining o‘g‘li bo‘lgan B.ga uzatib yuborgan. B.ning avval ham uylangani, ammo farzand ko‘rmagani sababli ajrashganini kattalar N.B.ga to‘y arafasida aytishgan.

Qayd etilishicha, N.B. to‘y o‘tgandan so‘ng to‘rt oy o‘tib ota uyiga qaytib kelgan. Bu orada tanishlari orqali voqeadan xabar topgan Sh.M. xorijdan qaytib kelgan va B.dan qasd olishni maqsad qilgan. U Qarshidagi qurilishda birga ishlaydigan R.R.ni o‘ziga sherik bo‘lishga ko‘ndirgan.

Ular B.ni o‘ldirish rejasini tuzishgan va tayyorgarlik ko‘rish maqsadida ikkita oshxona pichog‘i va maxsus qo‘lqop sotib olishgan. Shundan so‘ng Sh.M. jiyanini chaqirgan va unga tegishli «Lacetti»da B. yashaydigan qishloqqa borishgan.

Keyinchalik o‘tkazilgan tergov jarayonida aniqlanishicha, ular manzilga yaqin kelib mashinadan tushgan va B.ning uyiga borib yonilg‘i izlab yurishganini aytishgan. B. uydan 10 litr yonilg‘i olib chiqqach, R.R. uni chalg‘itgan, Sh.M. esa oshxona pichog‘ini uning tanasiga bir necha marta zarb bilan sanchgan. Oqibatda B.og‘ir tan jarohatlari olib vafot etgan. Qotillar esa yashirinishgan.

Ko‘p o‘tmay Sh.M. va R.R. ushlangan va ular qonun oldida javob berishgan. Sud ularning ikkalasini ham Jinoyat kodeksining 97-moddasining (Qasddan odam o‘ldirish) tegishli bandlari bilan aybli deb topib, uzoq muddatli qamoq jazosi tayinlagan. Bundan tashqari, sudlanuvchilardan marhumning qonuniy vakili foydasiga 50 million so‘m ma'naviy zarar undirilishi belgilangan.