Adliya vazirligi: “Qonun loyihasida tezlikni oshirganlik uchun jarimani kamaytirish bo‘yicha takliflar mavjud emas”

Adliya vazirligi Jamoatchilik bilan aloqalar bo‘limi boshlig‘i Sevara O‘rinboyevaning Kun.uz’ga ma'lum qilishicha, turli bahs-munozaralarga sabab bo‘layotgan tezlikni oshirganlik uchun jarimani kamaytirish taklifi Vazirlik tomonidan ishlab chiqilgan qonun loyihasida mavjud emas.

Uning aytishicha, 24 sentyabr kuni Oliy Majlis Qonunchilik palatasining navbatdagi majlisida “O‘zbekiston Respublikasining Ma'muriy javobgarlik to‘g‘risidagi kodeksiga o‘zgartish va qo‘shimchalar kiritish haqida”gi qonun loyihasini ko‘rib chiqish jarayonida adliya vaziri Ruslanbek Davletov ham ijtimoiy tarmoqlarda keng muhokama qilinayotgan taklif qonun loyihasida yo‘qligini ta'kidlagan.

Sevara O‘rinboyevaning qo‘shimcha qilishicha, qonun loyihasi deputatlar tomonidan e'tirozlarsiz, birinchi o‘qishda qabul qilingan.

Eslatib o‘tamiz, avgust oyida Adliya vazirligi tomonidan e'lon qilingan qonun loyihasida haydovchilar tomonidan sodir etilgan bir qator harakatlar uchun ma'muriy javobgarlikni bekor qilish va yengillashtirishga qaratilgan o‘zgartishlar nazarda tutilgandi.

Oliy Majlis Qonunchilik palatasi deputati, O‘zXDP fraksiyasi a'zosi Firdavs Sharipov “fuqarolar tomonidan bugungi kunda qo‘llanayotgan jarimalar miqdori yuqoriligi bo‘yicha e'tirozlar bildirilayotgani” sababli fraksiya deputatlari tomonidan transport vositalari haydovchilarining belgilangan harakat tezligini soatiga 20 kilometrdan ortiq, lekin 40 kilometrdan ko‘p bo‘lmagan kattalikda oshirib yuborganligi uchun jarima miqdorini kamaytirish haqida qonun loyihasiga taklif berilganini ma'lum qilgach, ushbu holat jamoatchilik tomonidan keskin e'tirozlarga sabab bo‘ldi.