Jalaquduqdagi hokim oyog‘i yetmagan mahalla: kuchlanish 110 volt, ichimlik suvi «kachalka»da, tappi serob

{Yii::t(}

O'tkazib yuborish 6s

O'tkazib yuborish

Bu safargi murojaatchi mahalla ahli favqulodda qat'iyatli chiqib qoldi. Ularning mahallasiga bormaganimizcha hol-u jonimizga qo‘yishmadi. Rejalashtirgan boshqa ishlarni bitirib, Jalaquduq tumani Jalaquduq mahallasi Oybuloq ko‘chasiga borgach, chindan ahvol arizachilar aytganicha borligini ko‘rdik. Oybuloq va ularga tutash Bo‘ston ko‘chalarida 70 chog‘lik xonadon yashash uchun kerak bo‘lgan oddiy sharoitlarsiz istiqomat qilmoqda.

Tasvirga oluvchi uskunalarimiz bilan ishni boshlaganimizda atrofimizga juda ko‘p odam yig‘ildi. Har birini bizga aytar so‘zi bor edi. Hududda muammolar yig‘ilaverib, oxiri odamlarning toqati toq bo‘lgan. Ularning aytishicha murojaatlari hech «yuqoriga» yetib bormas ekan. Oqsoqollar, onaxonlar 30 yildan beri biror hokim yoki rahbar hududga qadam bosib, xalq dardini eshitmaganini bildirishdi.

Biz mana shu ko‘chalarni kezib, har bir xonadonda tezakdan tappi yopilishini, qulayotgan simyog‘ochlardagi tosh osilgan elektr simlarni suratga tushirib, ichimlik suvi yo‘qligidan zax buloqdan suv tashiyotgan, elektr quvvati pastligidan oqshom dars qila olmayotgan o‘quvchilar, kiyim dazmol qila olmayotgan ayollar bilan suhbatlashdik.

«Bu yerga ko‘chib chiqqanimizga 40 yilcha bo‘ldi. Bolalar maktabga borib-kelishga bir oyda 2-3 ta poyabzal yirtar edi. Shundan beri o‘zimiz eplab, pul topib, yo‘llarga shag‘al to‘ktirib shu yerga yetib keldik. Shag‘allarimizni «yer yutdi», «svet» ham, ichimlik suvi chatoq. Suvi odamlarni kasal qilyapti, chiroq kech kirganida sham chiroqdan ham battar bo‘lib ketadi. Bolalar dars qila olmaydi.

Yozi bilan bu odamlar qishga tayyorgarlik ko‘radi. Xuddi chumoli don-dun to‘plagani kabi qishi bilan tezak-tappi qilishadi. Mahallada tappi qilmagan oilaning o‘zi yo‘q. Qop-qop tappi, tom to‘la tappi turadi», deydi Ro‘zixon aya Sultonova.

Qo‘lida ikkita paqir bilan zax zovur suvidan tashigani ketayotgan Halimaxon Sodiqova ichish uchun ham tomorqaga ham mana shu suvdan foydalanishlarini aytdi. Diloromxon ona Mirzarahimova xonadoniga kirsak, ona hovli sahnidagi qishga tayyorlangan tappilarni ag‘darayotgan ekan.

«Ikkita nabiram ikki-uch yashar bo‘ldi. Shu sababli qishga tayyorgarlik ko‘rib, mana shunaqa qilib tappilarni quyyapman. Nabiralarimni issiq saqlash, kasal qilmaslik uchun. Ko‘mir qimmat, sotib olishga qurbimiz yetmaydi», deydi Diloromxon ona.

Mahalla ulug‘laridan biri Muhammadqodir Hoshimov muammoli holatga quyidagi izoh berdi: «Ko‘chamizni, odamlarimizni bu mutasaddi rahbarlar, hokimlarimiz esdan chiqarib qo‘ygan, unutgan bo‘lsa kerak. Mana, ichimlik suvi yo‘q, zax suv ichamiz. Ko‘chalarimizni ham 36 yildan beri bilaman, bo‘lyapti inson kelib xabar olgani yo‘q. O‘zimiz qo‘limizdan kelganicha yo‘llarni shag‘alladik. Simyog‘ochlar eski. «Elektroset»ni o‘zi o‘lchab ketdi, kuchlanish 110 volt ekan. Murojaat qilamiz, natija yo‘q. Hokimni umuman tanimaymiz, ko‘rmaganman. Qabuliga bordik, mahalla komitetimiz eshikni tagida o‘tirgan ekan. Chiqib «Nega keldinglar?» deydi. Shunaqa ham bo‘ladimi? Bizni oyog‘imiz asfalt ko‘rmasa ham, kelajakda shu bolalarimizni oyog‘i loy bo‘lmay ketsin. Qishning kunida shu yorug‘ xonalarda dars qilsin deyman».

Karamatxon Egamberdiyeva, Tojmuhammad Haydarovlar mahallaga tuman hokimi kelib bor muammoni o‘z ko‘zi bilan ko‘rib, hal qilishga yordam berar degan umidda. Ayollar mahalla fuqarolar yig‘ini raisi tuman hokimi Hikmatillo Latipov MFY idorasining ochilishiga kelganida aholiga muammolarni aytishga qarshilik qilganini aytishdi. Mahalla ahlining ko‘plab murojaatlaridan so‘ng bundan uch yil avval transformatorning korpusini o‘rnatib ketishibdi. Lekin uning ichida ikkita o‘chirib-yondiradigan «avtomat»dan bo‘lak hech narsa yo‘q.

Jalaquduq tuman hokimligida

Jalaquduq tumani hokimligiga borganimizda hokim Hikmatillo Latipov ayni paytda Abdullabiy mahallasida ekanligini aytishdi. Tuman hokimi Jalaquduq mahallasida yaqin kunlarda bo‘lganini va barcha kamchiliklar bartaraf etilishini bildirdi.

Biz o‘sha yerga yetib kelgan suv va elektr ta'minoti rahbarlaridan muammoli holatlar bo‘yicha izoh oldik. Avvaliga tuman «Suv ta'minot» korxonasi rahbari Qahramon Turg‘unovni savolga tutdik.

«Jalaquduq mahalla Oybuloq ko‘chasidagi holatdan xabarimiz bor. Ko‘chaga suv tarmog‘i tortish uchun hujjatlarni tayyorlab qo‘yganmiz. Do‘ngqishloq mahallasi va Jalaquduq mahallasi qo‘shni. Davlat dasturi bilan Do‘ngqishloqqa 12 kilometr ichimlik suvi tarmog‘i va ikkita quduq o‘rnatyapmiz. O‘sha qishloqdan Oybuloqqa 600 metr tarmoq tortib, muammoni hal qilishni rejalashtirganmiz. Bir oy ichida ko‘chada ichimlik suvi boradi», deydi Qahramon Turg‘unov.

Mutasaddiga «Nega Oybuloqqa ichimlik suvi transport orqali yetkazib berilmayapti, aholini ular foydalanayotgan zax suv sog‘liq uchun xavfli ekanligi yuzasidan ogohlantirganmisizlar?» deb savol berdik. Turg‘unovning aytishicha ularning korxonasiga Oybuloqqa transport orqali ichimlik suvi yetkazib berish bo‘yicha MFY raisidan buyurtma kelib tushmagan. Oybuloq aholisi «Suv ta'minoti» korxonasi xodimlari tomonidan ular foydalanayotgan va ekspertizadan o‘tmagan zax suvdan foydalanmaslik bo‘yicha ogohlantirilgan ekan.

Jalaquduq tuman «Hududiy elektr tarmoqlari» korxonasi rahbari Anvarjon Abdurashidov biz bilan suhbatda Oybuloqdagi elektr muammosini hal qilish uchun beton tayanchlarga «zayavka» berilgani va bitta transformator o‘rnatish ishlari ketayotganini aytdi. «Buyurtma berilgan kabellar va beton tayanchlar kelishi bilan ish boshlaymiz. Oybuloqda bir oy ichida elektrdan muammo qolmaydi», deydi Abdurashidov.

Oybuloqliklar nega hokim kelishini kutmoqda? Chunki mahalla raisi shu paytgacha ularning dardini hokim va boshqa rahbarlarga yetkaza olmagan. Aholining aytishicha, hokim MFY yangi binosi ochilishiga kelganida mahalla raisi «hokimga ko‘changizdagi muammolarni aytmanglar» deya ularni qaytargan. Ming afsuski, mahalla raislari hudud muammolarini hokimga aytishga cho‘chishadi. Oqibatda esa yillar davomida Oybuloqdagi singari muammolar to‘planaveradi.

So‘nggi yillarda 60 ta mahallaga ega tumanda uch bora hokim almashdi. Oybuloqliklar dardini tinglashga ularni fursati yetmagandir. O‘ylaymizki, hozirgi hokim kamchiliklarga botgan ko‘cha aholisini uzoq kuttirmaydi...

Elmurod Ermatov, Kun.uz muxbiri,

Tasvirchi va montaj ustasi – Azizbek Ismoilov.