Xorijiy davlat fuqaroligini olgani haqida xabar bermagan O‘zbekiston fuqarolari javobgarlikka tortiladi – Deputatlar qonun loyihasini bir ovozdan ma'qulladi

Qonunchilik palatasi deputatlari tomonidan uchinchi o‘qishda qabul qilingan qonun loyihasiga ko‘ra, endilikda O‘zbekiston fuqarolari boshqa davlat fuqaroligini olgan taqdirda davlat organlarini xabardor qilmasa, javobgarlikka tortilishi mumkin. Bu haqda Oliy Majlis Qonunchilik palatasi deputati Farhod Ashmatovga asoslanib Ichki ishlar vazirligi matbuot xizmati xabar bermoqda.

Ma'lum qilinishcha, ayrim davlatlarda qo‘sh fuqarolik qonun bilan taqiqlanmagani sababli amaliyotda O‘zbekiston fuqarolari xorijda o‘zlari bo‘lib turgan mamlakat fuqaroligini qabul qilish holatlari uchramoqda. Shuningdek, vakolatli davlat organlariga O‘zbekiston fuqarolari tomonidan chet davlat fuqaroligini qabul qilish holatlarini aniqlash vazifasi yuklatilgan, lekin amaldagi qonunlarga asosan, fuqarolarda ushbu fakt yuzasidan davlat organlariga xabar berish majburiyati mavjud emas.

Qonunchilik palatasi deputati Farhod Ashmatovga ko‘ra, kelgusida bu kabi holatlarga yo‘l qo‘ymaslik va fuqarolarning mas'uliyatini oshirish maqsadida 24 avgustdagi yalpi majlisda deputatlar «O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida»gi qonuni loyihasini ikkinchi va uchinchi o‘qishda bir ovozdan ma'qullagan.

Qonun loyihasida quyidagilar nazarda tutilgan:

• O‘zbekiston Respublikasi fuqaroligida bo‘lgan va chet davlat fuqaroligini olgan shaxslarni, chet davlat fuqaroligini qabul qilgan kundan boshlab o‘ttiz kalendar kuni ichida xabar berish tartibi joriy qilinadi;
• Ma'muriy javobgarlik to‘g‘risidagi kodeksga O‘zbekiston Respublikasi fuqarolari tomonidan chet davlat fuqaroligini olgani haqida belgilangan muddatda xabar bermaganligi uchun javobgarlik kiritiladi;
• O‘zbekiston Respublikasi fuqaroligi tugatilgan shaxs tomonidan, O‘zbekiston Respublikasi fuqaroligi pasporti yoki identifikatsiya ID-kartalaridan foydalanganlik uchun ma'muriy javobgarlik belgilanadi;
• davlat xizmatchilari yoki hokimiyat vakili vazifalarini bajaradigan yoki davlat organlarida tashkiliy-boshqaruv yoxud ma'muriy-xo‘jalik funksiyalarni bajaradigan O‘zbekiston fuqarolari tomonidan chet davlat fuqaroligini olgani haqida belgilangan muddatda xabar bermagani uchun javobgarlik belgilanadi.

Ma'lumot uchun, 2020 yil 13 martda qabul qilingan «O‘zbekiston Respublikasining fuqaroligi to‘g‘risida»gi qonunning 12-moddasiga ko‘ra, O‘zbekiston Respublikasi fuqarolarining chet davlat fuqaroligiga mansubligi O‘zbekistonda tan olinmaydi.

Ya'ni prezidentning O‘zbekiston Respublikasi fuqaroligidan chiqish yoki fuqaroligini yo‘qotganlik to‘g‘risidagi qarori qabul qilinguniga qadar bir vaqtning o‘zida chet davlat fuqaroligiga ega bo‘lgan O‘zbekiston Respublikasi fuqarosi O‘zbekiston fuqaroligidan kelib chiqadigan majburiyatlarni bajarishdan bosh tortishi yoki javobgarlikdan ozod etilishi mumkin emas.

Shuningdek, ushbu qonunda O‘zbekiston Respublikasi fuqaroligi fuqarolikdan chiqish to‘g‘risidagi iltimosnomaga asosan amalga oshirilishi belgilangan.

Bundan tashqari, mazkur qonunning 25-moddasiga asosan, agar shaxs ixtiyoriy ravishda chet davlatning fuqaroligini olgan bo‘lsa uning O‘zbekiston Respublikasining fuqaroligi yo‘qotilgan hisoblanadi.