UzAuto Motors yangilangan Captiva uchun shartnomada narxlarni oshirish haqida hech qanday band yo‘qligini e'lon qildi

UzAuto Motors kompaniyasi yangilangan Chevrolet Captiva avtomobili uchun shartnoma tuzish boshlangandan so‘ng ijtimoiy tarmoqlarda shartnomadagi avtomobil narxi o‘zgarishi mumkinligi to‘g‘risida keltirilgan band bo‘yicha rasmiy munosabat bildirdi.

“Keltirilishicha, bizning kompaniya 2019 yildagi kelishuvni buzgan holda, yana shartnomaga yetkazib berilgan avtomobil uchun narxning oshishi mumkinligi to‘g‘risidagi bandni qayta kiritgan.

Kompaniya shartnomada bir tomonlama narxlarni oshirish haqida hech qanday band yo‘qligini rasman e'lon qiladi”, deyiladi kompaniya bayonotida.

Qayd etilishicha, shartnomaning 2.4 bandi hozirgidek kabi ilgari ham bo‘lgan. Ushbu bandda qo‘shimcha to‘lov faqatgina avtomobil komplektatsiyasi o‘zgargandagina amalga oshirilishi keltirilgan.

“Bundan ko‘rinib turibdiki, xabar mualliflari ushbu band, shuningdek, shartnomaning navbatdagi bandlari bilan to‘liq tanishishmagan”, deyiladi kompaniya tomonidan.

Kompaniyaning bildirishicha, “2.4.1 va 2.4.3 bandlariga ko‘ra, agar komplektatsiya e'lon qilingandan farq qilsa, xaridor to‘lovni qaytarish sharti bilan avtomobil xarididan voz kechish yoki uni almashtirish huquqiga ega”.

Shuningdek, ta'kidlanishicha, 2.4-band avtomobil komplektatsiyasi o‘zgarishi mumkin bo‘lgan vaziyatlarda mijoz uchun bir nechta takliflarni taqdim etadi.

“Ushbu shartnomada xaridor huquqlari himoyalangan va agar mijoz qo‘shimcha to‘lov qilishni xohlamasa, unda har doim tanlov huquqi bo‘lib: u xarid qilishdan voz kechib, pulni qaytarib olish yoki avtomobilni mos keladigan modifikatsiyaga almashtirishni talab qilish huquqiga ega”, deya ta'kidlagan kompaniya.

Shuningdek, UzAuto Motors shartnomaga muvofiq keltirilgan komponentlarga ko‘ra avtomobil narxi oshmasligini eslatib o‘tgan.

Avvalroq Saptiva 5 221 mln 691 ming so‘mdan 309 mln 900 ming so‘mgacha narxda sotuvga chiqarilishi xabar qilingandi.