22:34 / 04.10.2021
4392
Tesla 2021 йилнинг III чорагида 241 300 та электромобиль сотди. Бу – рекорд

Бу йил бошидан буён сотилган машиналарнинг 66 фоизи демакдир.

Фото: AP

Компания 2021 йилнинг III чорагидаги автомобиллар савдоси бўйича тўлиқ ҳисоботни эълон қилганича йўқ. Лекин ушбу ҳисоботдан ўрин олган энг муҳим рақамлар аллақачон маълум. Сўнгги уч ой давомида – июндан сентябрнинг охиригача 241 300 та электромобиль сотилган. Бу рекорд автомобил бозоридаги чиплар танқислиги туфайли дунё бўйлаб савдо пасайиб кетган вақтда қайд этилгани айниқса аҳамиятли.

Таққослаш учун, Tesla йил бошидан буён 367 500 дона электромобиль сотган бўлса, шунинг 66 фоизи битта чоракка тўғри келмоқда. Ички ёнув двигатели билан жиҳозланган анъанавий автомобиллар ишлаб чиқарадиган компаниялар, хусусан, General Motors учинчи чоракда 446 997 дона автомобиль сотган. Кўрсаткич ўтган йилнинг шу даврига нисбатан 33 фоизга камайган. Tesla’нинг ишлаб чиқариш қамрови, омборлари, дилерлари, хизматчилари ва бошқа русерсларини General Motors’ники билан солиштириб бўлмайди.

Автомобиль бозоридаги беқарор даврда Tesla’нинг ўзгарувчан бозор шароитларига тез мослаша олгани сабабли электромобиль савдосида кескин ўсиш кузатилди. Чиплар танқислиги бошланиши билан Tesla зудлик билан бошқа ишлаб чиқарувчилар билан ишлай бошлади ва уларнинг маҳсулоти аввалги чиплар билан бир хилда ишлаши учун дастурий таъминотини янгилади.

Top