20:28 / 08.10.2021
9007
“Навоийазот” Зарафшон дарёсига хавфли моддалар оқизгани аниқланди. Кўплаб балиқлар нобуд бўлган
Фото: Экология ва атроф-муҳитни муҳофаза қилиш қўмитаси

“Навоийазот” АЖ томонидан Зарафшон дарёсига ҳаёт учун хавфли бўлган моддалар оқизилган. Бунинг оқибатида дарё суви заҳарланиб, кўплаб балиқлар нобуд бўлган. Экология қўмитаси бу ҳолатни ноинсофлик дея баҳоламоқда.

Қўмита матбуот хизматининг маълум қилишича, корхонага қарашли 267-қудуқдан дарёга ҳаёт учун хавфли моддалар чиқарилган. Навоий вилояти Экология ва атроф-муҳитни муҳофаза қилиш бошқармаси инспекторлари томонидан Зарафшон дарёсининг Кармана туманидан оқиб ўтувчи қисмининг 5 та нуқтасидан таҳлил намуналари олиб, текшириб кўрилган.

Натижада дарё сувида азот аммоний 21 маротаба, азот нитрат 2,6 маротаба, азот нитрит 60 маротаба, хлоридлар 1,3 маротаба, мис ионлари 2,1 маротаба белгиланган меъёрлардан юқорилиги ҳамда дарёда ёппасига заҳарланиш юзага келганлиги аниқланган.

Фото: Экология ва атроф-муҳитни муҳофаза қилиш қўмитаси
Фото: Экология ва атроф-муҳитни муҳофаза қилиш қўмитаси
Фото: Экология ва атроф-муҳитни муҳофаза қилиш қўмитаси

Ҳозирда ҳолат юзасидан дастлабки ўрганиш-суриштирув ишлари давом этмоқда.

Олдинроқ Сурхондарёда Қизил китобга киритилган сиртлон овлангани айтилганди. Кейинчалик уни чўпонларнинг итлари ўлдирган бўлиб чиқди.

Top