Bulung‘urdagi nimstansiyada yong‘in sodir bo‘ldi. Odamlar chiroqsiz qoldi

Ijtimoiy tarmoqlarda Bulung‘ur tumanida joylashgan markaziy nimstansiyaning yonayotgani tasvirlangan videolar tarqaldi. Holat bo‘yicha tuman hokimligi axborot xizmati ma'lumot berdi.

Ijtimoiy tarmoqlarda tarqalgan xabarlarda Bulung‘ur tumanida joylashgan nimstansiya yonib ketgani va oqibatda tumanning bir qancha mahallalarida chiroq o‘chgani haqida xabar berildi. Tuman hokimligi axborot xizmati ma'lumotida esa nimstansiyada yong‘in bo‘lgani haqida yozilmagan, balki qisqa tutashuv bo‘lgani ma'lum qilingan.

«Bugun 2021 yil 21 oktyabr kuni kech soat 17:01 larda Bulung‘ur markaziy nimstansiyasida qisqa tutashuv sodir bo‘lgan. Bunga sabab nimstansiyani qo‘shib-o‘chiruvchi elektr shitining tepa qismidagi choynaklarga suv kirgan.

Biroq, tutashuv sabab himoya vositasi («zashitnik»)da ham nosozlik yuzaga kelib, o‘z vaqtida ishlamay qolgan. Tutashuv natijasida tumanning Mehrjon, Istiqlol, Yangiqo‘rg‘on, Guliston, Ulug‘bek, Samarqand mahallalari hamda Do‘stlik mahallasining ayrim qismida elektr ta'minotida uzilishlar yuzaga kelgan. Nosozlik kuzatilgan «Bulung‘ur» nimstansiyasiga Magistral elektr tarmoqlari korxonasi xizmat ko‘rsatadi», deyiladi hokimlik axborot xizmatining ma'lumotida.

Qayd etilishicha, hodisa yuz bergan joyga Samarqand hududiy elektr tarmoqlari bosh muhandisi Sunnat Nomurodov boshchiligidagi tezkor («avariya») brigada yetib borgan.

«Nocozlik sabablari aniqlandi va uni bartaraf etish choralari ko‘rilmoqda. Ayni vaqtda zaruriy jihozlar Samarqand viloyatidan keltirilmoqda. Nosozlikni qisqa vaqtda bartaraf etish choralari ko‘rilmoqda», deyiladi ma'lumotda.