“Olot” chegara postida 531 mln so‘mlik tovarlar to‘xtatib qolindi

Buxoro viloyati bojxona boshqarmasi “Olot” chegara bojxona posti xodimlari mamlakatga noqonuniy tovar olib kirish bilan bog‘liq ikkita holatni fosh etishdi. Bu haqda viloyat bojxona boshqarmasi xabar berdi.

Xususan, qo‘shni davlatdan kirib kelgan yuk avtomashinasi belgilangan tartibda bojxona nazoratidan o‘tkazilgan. Ko‘rik davomida yuk kuzatuv hujjatlarida ko‘rsatilmagan, qiymati qariyb 424 mln so‘mlik har-xil turdagi tovarlar borligi aniqlangan.

Yana bir holatda yuk avtomashinasi “Inspeksion ko‘rik majmuasi” orqali belgilangan tartibda bojxona nazoratidan o‘tkazilgan hamda hujjatlarda ko‘rsatilganidan ortiqcha, umumiy qiymati 107 mln so‘mlik 2 691 dona gaz ballonlarda foydalaniladigan yondirgich tovarlari borligi aniqlangan.

Hozirda mazkur holatlar yuzasidan bojxona organlari tomonidan surishtiruv harakatlari olib borilmoqda.