Qo‘yliqda tadbirkorlarga bozorni bo‘shatib qo‘yish bo‘yicha “ogohlantirish xati”ga imzo qo‘ydirilmoqda

Bu haqda ijtimoiy tarmoqlarda tarqalgan ma'lumotni bozorda ishlovchi ikki savdogar Kun.uz'ga tasdiqladi.

Internetda tadbirkorlar tomonidan bozor direktori nomiga yozib berilayotgan “ogohlantirish xati” surati tarqaldi.

“Men... “Qo‘yliq dehqon bozori”AJ hududida savdo faoliyati bilan shug‘ullanaman. Savdo faoliyatimni 2021 yil 31 dekabr kunida tugatib, 2022 yil 1 yanvar kunidan “Food city”da faoliyatimni davom ettiraman. Agarda yuqoridagi qonuniy talabga amal qilmasam, O‘zbekiston Respublikasi Ma'muriy javobgarlik to‘g‘risidagi kodeksining 183-, 194– va Jinoyat kodeksining  277-, 229-moddalari asosida javobgarlikka tortilishim to‘g‘risida ogohlantirildim”, deyiladi xatda.

Mazkur “ogohlantirish xati”da keltirilgan moddalardan biri – MJtKning 183-moddasi – mayda bezorilik bilan bog‘liq. Shu kodeksning 194-moddasida ichki ishlar organlari xodimining qonuniy talablarini bajarmaslik haqida so‘z boradi.

“Ogohlantirish xati”da bozor ma'muriyati talabi bajarilmasa, tadbirkorlar go‘yoki Jinoyat kodeksining 2 ta moddasi (229, 277) bilan javobgarlikka tortilishi ko‘rsatilgan. 229-modda – o‘zboshimchalik, 277-modda esa bezorilik haqida.

Eslatib o‘tamiz, 7 dekabr kuni Toshkent shahar hokimligi Qo‘yliq dehqon bozori va unga tutash ulgurji savdo maydoni yo‘l kengaytirilishi sabab boshqa manzilga ko‘chirilishini ma'lum qildi.

Keyinroq bozor Qo‘yliqdan 6,5 km masofadagi, Toshkent viloyati O‘rta Chirchiq tumanida joylashgan “Food city” savdo markaziga ko‘chishi ma'lum bo‘ldi.

Kun.uz bilan suhbatlashgan bozorchilar bu qarordan norozi ekanini bildirishdi. Ularga ko‘ra, yangi majmuadagi do‘konlar ijarasi haddan tashqari qimmat, maydoni esa juda kichik. Savdogarlar bozor ko‘chishi natijasida Toshkentda oziq-ovqatlar narxi oshishini aytishdi.

“Food city” savdo majmuasi vakilining Kun.uz'ga bildirishicha, ijaraga do‘kon olish uchun 100 mln so‘mdan ortiq mablag‘ni garov sifatida qo‘yish kerak va oyiga 3,5 mln so‘mdan ijara to‘lovi amalga oshirib borish lozim.

Iqtisodchi Otabek Bakirov ko‘prik qurish vaji bilan bozorni ko‘chirish tadbirkorlarni “Food city”ga o‘tkazish maqsadida qilinayotgani haqidagi fikrlarga qo‘shilishini bildirdi.

“Istalgan normal hukumat, saylangan parlamentga hisobdor hukumatning bozorga, iqtisodiyotga oid eng asosiy vazifasi raqobat muhitini rag‘batlantirish hisoblanadi. Aksi emas. Hukumatning bozordagi bir sub'yektning foydasiga chiqariladigan qarori boshqa bir sub'yektning, ayniqsa o‘n minglab iste'molchilarning ziyoniga ishlamasligi kerak.

“Food city” majmuasi rostdan ham raqobatbardosh bo‘lsa, buni sog‘lom raqobat yo‘li bilan amalga oshirishi lozim. “Qo‘yliq”dagi bozorlar bilan raqobatlashmoqchi ekan, ijara narxlarini, do‘kon narxlarini “Qo‘yliq”dagidan karrasiga qimmat emas, karrasiga afzalroq qilishi kerak.

“Qo‘yliq dehqon bozori” AJ va “Qishloq xo‘jaligi mahsulotlari ulgurji bozori” AJ do‘kondorlari, ijara huquqini sotib olganlarga hech qanday kompensatsiya yoki chegirma yo‘q. Shahar hokimiyatidagilar “Qo‘yliq”dagi ijara do‘konidan ajrayotgan tadbirkorlarga “Food city”dan ijaraga do‘kon olishlari mumkinligini aytish bilan cheklanishgan. Bulardan yana boshqa nimani kutish mumkin?” deya yozadi u.