Stoltenberg NATO Rossiyaning qarshiligiga qaramasdan kengayishini ma’lum qildi

Avvalroq Rossiya prezidenti Vladimir Putin NATOning sharqqa kengaymasligi borasida yuridik kafolat kerakligini aytgandi.

Foto: nato.int

NATO nafaqat so‘zda, balki amalda ham ochiq eshiklar siyosatini tutadi, dedi alyans bosh kotibi Yyens Stoltenberg Ukraina prezidenti Vladimir Zelenskiy bilan o‘tkazilgan muzokaralardan so‘ng bo‘lib o‘tgan matbuot anjumanida.

U so‘nggi yillarda Chernogoriya va Shimoliy Makedoniya NATOga qabul qilinganini eslatib o‘tdi.

«Biz Rossiyaning noroziliklariga qaramasdan Shimoliy alyansni kengaytirdik», — dedi u.

Shuningdek, Stoltenberg alyans Yevropaning boshqa mamlakatlarini NATOga qo‘shilishga taklif etish imkonini beruvchi Shimoliy Atlantika shartnomasining 10-moddasini eslatdi.

Uning so‘zlariga ko‘ra, Ukrainaning NATOga qo‘shilishi to‘g‘risidagi qaror Kiyevning o‘zi va alyansning 30 a’zosi tomonidan qabul qilinadi.

1 dekabr kuni Rossiya prezidenti Vladimir Putin NATOning sharqqa kengaymasligi borasida yuridik kafolat kerakligini aytgandi. U AQSh prezidenti Jo Bayden bilan muloqotida ham bu mavzuni ko‘tardi.

Tayyorlagan: Дилшод Аскаров

#NATO #Rossiya