Toshkentdagi professional boks kechasida O‘zbekistonning 7 vakili ham g‘alaba qozondi - Madrimov raqibini texnik nokaut evaziga mag‘lub etdi

-79,39 kg vaznda Dilshodbek Ro‘zmetov (1-0) professional boksdagi ilk jangini rossiyalik Maksim Smirnovga (8-10-3, 4 KO) qarshi o‘tkazib, 6 raundga mo‘ljallangan jangda ochkolar soniga ko‘ra g‘alaba qozondi. Uchala hakam ham 60:54 hisobini qayd etishdi.

-69,85 kg vazn toifasida Iqboljon Xoldorov ikkinchi jangida (2-0, 2 KO) belaruslik Dmitriy Miliushani (9-6-1, 4 KO) 1-raunddayoq (2:40 soniya) nokautga uchratdi. Andijonlik bokschi nokaut qayd etilgunicha raqibini 2 bor nokdaunga tushirdi.

-58,97 kg vaznda Elnur Abduraimov (8-0, 7 KO) 8-jangida filippinlik Jon Geminoni (22-13-1, 12 KO) 6-raundda nokaut qildi. 

-80,29 kg vaznda Bektemir Meliqo‘ziyev (8-1, 6 KO) rossiyalik Sergey Yekimovni (18-3, 9 KO) 8 raundlik jangda ochkolar evaziga mag‘lubiyatga uchratdi. Hakamlar 80:72, 80:71, 80:71 hisoblarini qayd etishdi.

Kechaning asosiy kardidan o‘rin olgan dastlabki jangda -48,99 kg vaznda Hasanboy Do‘smatov (4-0, 4 KO) Meksika vakili Xose Rivas (18-13-4, 10 KO) ustidan texnik nokaut evaziga ustun keldi. 4-raunddan so‘ng Rivas jarohat tufayli jangni davom ettira olmasligini ma’lum qildi. 

-64,86 kg vaznda Shahram G‘iyosov (12-0, 9 KO) argentinalik Kristian Koria (29-9-2, 13 KO) ustidan ochkolar natijasiga ko‘ra g‘alaba qozondi. 10 raundlik jangda hakamlar 100:90, 100:90, 99:91 hisobini qayd etishdi.

Oqshomning markaziy jangida -69,85 kg vaznda Isroil Madrimov (8-0, 6 KO) fransiyalik Mishel Soro (35-3-1, 24 KO) bilan to‘qnash keldi va jiddiy raqibini 9-raund yakunida texnik nokaut evaziga mag‘lub etdi. 

E’tiborlisi, referi raund yakunida chalingan gongni eshitmadi va nokaut raund vaqti tugaganidan keyin sodir bo‘ldi.

Madrimov g‘alabadan so‘ng WBA chempionlik kamari uchun rasmiy da’vogarga aylandi.