Putin Rahmon bilan uchrashuvda tojikistonlik migrantlarning Rossiyada yashashga moslashuvini muhokama qildi

Hozirda Tojikistonning 1 million nafarga yaqin fuqarosi Rossiyada vaqtinchalik asosda yashab-ishlamoqda, dedi Rossiya prezidenti Vladimir Putin Tojikiston prezidenti Imomali Rahmon bilan uchrashuvida. Ikki mamlakat rahbarlari uchrashuvi Sankt-Peterburgda bo‘lib o‘tdi.

«Rus tilini o‘rganishni istaganlar juda ko‘p – bu tushunarli, chunki Rossiyada Tojikistonning 1 millionga yaqin fuqarosi vaqtinchalik asosda yashayapti va ishlayapti. O‘tgan yili ular uylariga 1 mlrd 800 mln dollar jo‘natgan», — dedi Putin.

Uning so‘zlariga ko‘ra, rus tilini o‘rganish odamlarning xotirjam ishlashi, o‘zlarini qulay his qilishlari uchun moslashuvning eng to‘g‘ri usuli hisoblanadi.

Putin Tojikiston Rossiyaning ishonchli va yaqin ittifoqchilaridan biri ekanini ta’kidladi. 

O‘z navbatida, Tojikiston prezidenti ikki mamlakat munosabatlari barcha yo‘nalishlarda rivojlanayotganini qayd etdi.

«Rossiya Tojikistonning asosiy savdo va iqtisodiy hamkori bo‘lib qolmoqda. Bu yil tovar almashuv 1 mlrd dollardan ortiqqa oshdi, bu o‘tgan yilgiga nisbatan 25 foizga ko‘p»,— dedi Rahmon.