Aksilmonopol qo‘mita Qashqadaryodan chigit olib chiqishni taqiqlaganlarga chora ko‘rilishini ma’lum qildi

O‘zbekiston Respublikasi Monopoliyaga qarshi kurashish qo‘mitasi chigit xomashyosi “Umakay” postidan o‘tkazilmayotgani yuzasidan Qashqadaryo viloyati hokimligi va viloyat IIBga so‘rovnoma yuborgan.

Qo‘mita axborotiga ko‘ra, holat yuzasidan qo‘mitaga ham murojaatlar kelib tushgan. Bu murojaatlar monopoliyaga qarshi qonunchilik hujjatlari doirasida chora ko‘rish uchun o‘rganilmoqda.

Holat yuzasidan qo‘shimcha ma’lumot berilishi ma’lum qilindi.

Aksilmonopol organning eslatishicha, 2020 yilda ham 3 ta viloyatda bu kabi holat kuzatilgan. 2020 yil 27 noyabrda “Raqobat to‘g‘risida”gi qonunning 12-moddasi talablari buzilgani bo‘yicha Vazirlar Mahkamasining 2005 yil 12 oktyabrdagi 225-sonli qaroriga muvofiq Qashqadaryo, Xorazm va Surxondaryo viloyat hokimliklariga hamda ushbu viloyatlarning IIBlariga nisbatan qo‘mita tomonidan ish qo‘zg‘atilgan edi.

O‘shanda qonunchilik talablari buzilgani o‘z tasdig‘ini topgan, shu sababli hokimliklarga va viloyatlarning IIBlariga nisbatan qo‘mita qarori qabul qilingan va ko‘rsatma berilgan.

Eslatib o‘tamiz, ayni kunlarda Qashqadaryo viloyatidagi korxonalar tomonidan birja savdolariga qo‘yilgan chigit mahsulotlarini sotib olganlar o‘z xaridlarini viloyat hududidan olib chiqishda to‘siqlarga uchramoqda.

Kun.uz holat yuzasidan surishtiruvini davom ettirmoqda. Avvalroq dastlabki tafsilotlar e’lon qilingan edi.