Qashqadaryoda tanish ayolnikiga borgan fuqaroni videoga olib, so‘ng uni tarqatishini aytib pul olgan blogerning ishi sudda ko‘rilmoqda

Ma’lum bo‘lishicha, 2021 yil 25 may kuni soat 21:00 larda fuqaro S.S. Nishon tumani Nuriston mahallasida yashovchi tanish ayolning uyiga borgan. Shu kuni kech soat 03:30 da ikki nafar shaxs ayolning xonadoniga bostirib kirgan. Ularning biri o‘zini «Ma’ruf bloger» deb tanishtirib, S.S.ni urib, telefoni bilan tasvirga tushirgan.

Shundan so‘ng «Ma’ruf bloger» S.S.ga videotasvirni ijtimoiy tarmoqlarga chiqarib yuborib sharmanda qilishini aytib, undan 2 million so‘m pul talab qilgan. S.S. holat yuzasidan IIBga murojaat qilgan.

Murojaat yuzasidan 2021 yil 29 may kuni o‘tkazilgan tadbirda fuqaro R.M. S.S.dan talab qilingan 2 million so‘mdan 1 millionini olgan vaqtda ushlangan.

Mazkur holat yuzasidan R.M.ga nisbatan Nishon IIB tergov bo‘linmasi tomonidan Jinoyat Kodeksining 165-moddasi 1-qismi bilan jinoyat ishi qo‘zg‘atilib, qamoq ehtiyot chorasi qo‘llanilgan.

2021 yil 17 noyabr kuni, Jinoyat ishlari bo‘yicha Dehqonobod tuman sudi tomonidan R.M. Jinoyat kodeksining 165-moddasi 2-qismi “v” bandi (tovlamachilik) va 139-moddasining 2-qismida nazarda tutilgan (tuhmat) jinoyatlarni sodir etganlikda aybli deb topilib, 3 yil 1 oy ozodlikdan mahrum qilish jazosi tayinlangan.

Dastlabki sud jarayoni va tayinlangan jazoga e’tiroz bildirgan sudlanuvchi R.M. belgilangan muddatda yuqori instansiyaga shikoyat qilgan. Sudlanuvchining mazkur shikoyat arizasi 2022 yil 7 yanvar kunidan boshlab Qashqadaryo viloyat sudi jinoyat sudlov hay’ati tomonidan ko‘rib chiqilmoqda.

Ma’lumot uchun, 2022 yil 6 yanvar kuni Qashqadaryo viloyati sudida taniqli sportchi Elbek Rahimovning o‘ldirib ketilishi yuzasidan 26 nafar kishiga nisbatan ochiq sud boshlangan.