“Buxoro neft bazasi” tomonidan faoliyati tugatilgan fermer xo‘jaliklariga qariyb 2 mlrd so‘mlik yonilg‘i berilgani aniqlandi

“O‘zbekneftgaz” AJ tomonidan olib borilgan o‘rganishlarga ko‘ra, “Buxoro neft bazasi” MChJning fermerlarga yonilg‘i tarqatuvchi 10 ta shoxobchasida 2,1 mlrd so‘mlik 206,7 ming litr neft mahsuloti kamomadi aniqlanib, 921,1 mln so‘mi qoplanishi ta’minlangan. Yana 10 ta shoxobcha  tomonidan esa 1,8 mlrd so‘mlik 261,7 ming litr yonilg‘i mahsulotlari faoliyati tugatilgan fermer xo‘jaliklariga rasmiylashtirilgani aniqlangan.

Qayd etilishicha, jamiyatning sobiq rahbariyati va mutasaddi xodimlari esa 3 mlrd so‘mlik 1 mln 595,3 ming litr neft mahsulotlarini fermer xo‘jaliklariga arzon narxlarda rasmiylashtirib, jamiyatga zarar keltirgan. Shuningdek, jamiyat mutasaddi xodimlari tomonidan xususiy AYoQShlarga jami 2,6 mlrd so‘mlik neft mahsulotlari to‘lovsiz yetkazib berilib, debitor qarzdorligi yashirib kelingan.

Mazkur qonunbuzilish holatlari bo‘yicha to‘plangan hujjatlar huquqni muhofaza qiluvchi idoralarga taqdim etilgan.