«O‘zbekistondagi ijtimoiy kayfiyat Qozog‘iston, Belarus yoki Rossiyadagidan jiddiy farq qiladi» - Kamoliddin Rabbimov

Siyosatshunos Kamoliddin Rabbimov Belarus prezidenti Aleksandr Lukashenkoning Qozog‘istondagi voqealardan birinchi navbatda O‘zbekiston saboq chiqarishi kerakligi haqidagi gaplariga munosabat bildirdi.

«Belarus prezidenti Lukashenko «O‘zbekiston ehtiyot bo‘lsin! Keyingi navbat O‘zbekistonga bo‘lishi mumkin!» deb ogohlantirish berdi. U bu ogohlantirishni KXShTning onlayn yig‘ilishida bildirgan.

Lukashenko o‘z vaziyatini legitimlashtirishni, boshqa prezidentlar ham «uni tushunishlari»ni istaydi. Ya’ni Lukashenko «o‘tgan yillari g‘arb kuchlari, qudratli siyosiy hokimiyat markazlari (jumladan Moskva ham) menga ko‘p azob berdi... Endi navbat sizlarga ham kelyapti!» demoqda.

O‘zbekistondagi ijtimoiy kayfiyat, Qozog‘istondagidan, Belarusdagidan, Rossiyadagidan jiddiy farq qiladi. O‘zbekiston ma’muriyati yosh va legitimligi yuqori. Nazarboyev hokimiyatda 32 yildan beri, Lukashenko – 28 yildan beri, Putin – 22 yildan beri. Bu davlatlarning fuqarolari o‘z prezidentlaridan jiddiy zerikkan.

Qozog‘istondagi g‘alayonlarda G‘arb davlatlari, tashkilotlari yoki fuqarolarining qo‘li borligi to‘g‘risida, hatto Qozog‘istonning bitta ham mulozimi nomiga bo‘lsa-da, gapirmadi. Lekin Lukashenko g‘arbga shama qilyapti.

O‘zbekiston, albatta, ehtiyot bo‘lishi kerak. Lekin g‘arbdan emas, shimoldan ehtiyot bo‘lishi kerak. Chunki O‘zbekistondagi ijtimoiy-siyosiy vaziyatning izdan chiqishi, natijada vaziyatga tashqi ta’sirning oshishi, afsuski, shimol foydasiga bo‘lishi ehtimoli yuqori. Qozog‘istonda shunday bo‘ldi», deb yozadi siyosatshunos.