“Gap platformada emas...” - “Adolat” partiyasining TikTok'ni butunlay bloklash taklifi tanqidga uchradi

Partiya matbuot xizmati so‘nggi vaqtlarda sodir bo‘layotgan ko‘ngilsiz voqea-hodisalarni hisobga olib shunday qarorga kelinganini bayon qilgan.

“Bugungi yosh avlodning “tiktoker”lik vasvasasida olayotgan turli-tuman videolari orasida o‘zgalar hayotiga daxl qiluvchi nomaqbul kadrlarning ham ko‘payayotgani mazkur masalaga jiddiyroq yondashishimiz lozimligidan dalolat beradi”, – deyiladi partiya munosabatida.

“Adolatchi”lar bir necha kun avval Samarqandda ko‘chada ketayotgan yoshi keksa odamning yuziga tepib o‘tib ketgan tiktokerning videosi shular jumlasiga kirishini aytadi.

“Biron bir sababsiz, shunchaki ijtimoiy tarmoq “yulduzi” bo‘lish ilinjida qasddan qilingan ushbu tajovuzkorlik, ko‘pchilikning noroziligiga sabab bo‘lmoqda. Vaholanki, hech qanday omil yoshi ulug‘ insonlarga nisbatan qo‘pol munosabatda bo‘lishga sabab bo‘la olmaydi. Bunday holatlar millatimiz, ma’naviy-madaniy qarashlarimizga tamomila zid tushunchalardir”.

Bunday illatlarga qarshi birgalikda kurashga chaqirgan «Adolat» sotsial-demokratik partiyasi faollari yoshlarni millatga yot bo‘lgan har qanday g‘oya va qarashlardan himoyalash tarafdori ekanligini yozgan.

“Bunday sharafli yo‘lda kerak bo‘lsa, jinoiy javobgarlik choralarini kuchaytirishimiz, foydasidan ko‘ra ziyoni ko‘p bo‘layotgan internet tarmog‘idagi bunday mobil ilovalarni sodir bo‘layotgan ko‘ngilsiz voqea-hodisalarni hisobga olgan holda butunlay bloklashimiz lozim.

“Shusiz ham taqiqlar mavjud-ku” deyishimiz mumkin. Biroq ko‘r-ko‘rona mashhurlikka o‘ch yoshlar ongini zaharlab, ijtimoiy tarmoqda shuhrat qozonishga “oltin ko‘prik” vazifasini o‘tayotgan TikTok bilan tiktokerlarimiz VPN ilovasi orqali ulanish imkoniyati borligi bu masalani ham o‘rganib chiqish zarurligini ko‘rsatadi”, – deyiladi partiya bayonotida.

O‘zbekiston mustaqilligini mustahkamlash uchun demokratik jarayonlarni jadallashtirishni o‘z oldiga vazifa qilib qo‘ygan partiyadan yangragan bu taklif jamoatchilik tomonidan salbiy qarshilandi.

Bloger va huquqshunos Xushnud Xudoyberdiyev “o‘zi hech vaqoni tushunmay gapiradigan, ko‘r-ko‘rona populizmga o‘ch, ijtimoiy tarmoqlarda shuhrat qozonishga intiladigan partiyalarni o‘zini butunlay yopishni taklif qilaman” deya tvit yozdi.

Yana bir foydalanuvchi esa gap platformada emas, balki tarbiyada ekanini, TikTok bo‘lmasa yana boshqa ijtimoiy tarmoqlar borligini eslatdi.

Bloger va iqtisodchi Otabek Bakirov esa “Adolat” a’zolari TikTok'da faqat yomon kontentlarga duch kelishini tasodif emas, sun’iy intellekt algoritmi bilan bog‘liq bo‘lishi mumkinligini aytgan. Shuningdek, bloger bolalarni nima ko‘rishini ota-onasi, kattalar uchun o‘zlari hal qilishi kerakligini ta’kidladi.

“Bolalar uchun javobgar ota-onalar bor va har bir telefon va gadjetga mutanosib filtrlar o‘rnatish, salbiy deb hisoblanilgan axborotdan muhofazalash ularning vazifasi va mas’uliyati. Toki voyaga yetguncha.

Yo sizlar biz kattalar uchun xavotirdamisiz? Nimani ko‘rish yo nimani ko‘rmaslikni, nima o‘qish yoki o‘qimaslikni hal qilishdek oddiy tanlovni o‘zbekistonliklarning o‘ziga qoldiring, iltimos. Biz uchun tanlab bermang, o‘lchab bermang, qaror qilmang.

Balki siz o‘zingizdan xavotirdadirsiz? Balki siz o‘zingiz tarmoqda, ayniqsa, TikTok'da duch kelayotgan kontentlardan o‘zingizni tiya olmayotgandirsiz? Mana bu rostdanam muammo. Afsuski, bu masalada sizlarga shaxsan men yordam bera olmayman”, – deydi Bakirov.

2021 yil dekabr oyida bo‘lib o‘tgan Toshkent yoshlar forumida qatnashgan Toshkent shahar hokimi Jahongir Ortiqxo‘jayev va adliya vaziri Ruslanbek Davletov ijtimoiy tarmoqlar bloklanishiga shaxsiy munosabatlarini bildirgan edi.

Poytaxt hokimi TikTok'da turli kontentlar borligini, unga taqiq qo‘ygan odamlar kerakmas kontentlarga kirganini aytgandi.

“Agar kerakli kontentlarga kirilsa, platformaning hech qanday zarari yo‘q, deb o‘ylayman. Mening fikrimcha, tag‘in bilmadim”, degandi Jahongir Ortiqxo‘jayev.

Cheklovlar maqbul darajada va qonunga qarab bo‘lishi kerakligini aytgan adliya vaziri Ruslanbek Davletov esa hozirgi zamonda axborotni cheklab bo‘lmasligini eslatgan.

“Ijtimoiy tarmoqlarga keladigan bo‘lsak, men axborot almashinuvida erkinlik tarafdoriman. Bugungi zamonda axborotni hech qachon cheklab, uning ustiga o‘tirib, jilovlay olmaysiz. Hech qachon qilolmaysiz”, – degandi hukumat a’zosi.

Ma’lumot uchun, O‘zbekistonda 2021 yil 2 iyuldan Twitter va TikTok'ka rasman cheklov qo‘yilgan.

15 dekabr kuni Mass-media fondi raisi Komil Allamjonov TikTok rahbariyati bilan muzokara o‘tkazishi ortidan, O‘zbekistonda bu platforma faoliyati qisman tiklandi.

“TikTok zararli bo‘lsa, uni foydali resursga aylantirish lozim. Shu va bunga o‘xshash kompaniyalar faoliyatini cheklash emas, balki ular bilan yaqindan muloqot, hamkorlik o‘rnatgan holda ishlash hamma uchun ko‘proq manfaatli va to‘g‘riroq bo‘ladi deb o‘ylayman”, degandi o‘shanda Komil Allamjonov.

Eslatib o‘tamiz, o‘tgan yili sentyabrda “Milliy tiklanish” partiyasi ham TikTok'ni O‘zbekistonda to‘liq bloklashni taklif qilgan edi.