IIV: Belgilangan talablarga javob bersa, istalgan tadbirkorlik sub’yekti imtihon tizimi uchun litsenziya olishi mumkin

Qayd etilishicha, 2021 yil 1 apreldan boshlab tegishli litsenziyaga ega tadbirkorlik sub’yektlariga barcha toifadagi avtomototransport vositalarini (trolleybus va tramvaydan tashqari) boshqarish huquqini beruvchi haydovchilik guvohnomasini olish uchun nazariy va amaliy imtihonlarni o‘tkazish huquqi berilgan.

Bu – 2020 yil 7 dekabrda qabul qilingan “Davlat tomonidan tartibga solinadigan sohalarga xususiy sektorni jalb etish bo‘yicha qo‘shimcha chora-tadbirlar to‘g‘risida”gi prezident qarorida belgilangan.

Mazkur qaror ijrosini ta’minlash maqsadida 2021 yil 4 mayda “Avtomototransport vositalarini boshqarish huquqini beruvchi haydovchilik guvohnomalarini olish uchun imtihonlarni o‘tkazish sohasiga xususiy sektorni jalb etishga doir qo‘shimcha chora-tadbirlar to‘g‘risida”gi hukumat qarori (272-son) qabul qilingan.

“Yuqoridagi qarorlar asosida haydovchilik guvohnomasini olish uchun nazariy va amaliy imtihonlarni o‘tkazish huquqiga ega bo‘lish uchun tadbirkorlik sub’yektlari zimmasiga ma’lum bir talablar belgilab qo‘yilgan. Bunda eng avvalo imtihonlar inson omilisiz, to‘liq avtomatlashtirilgan holda amalga oshirilishi, zamonaviy avtodrom mavjudligi, maxsus himoyalangan dasturiy ta’minotlar kompleksiga egaligi hamda imtihonlar jarayonida olingan ma’lumotlarga hamda imtihon natijalariga o‘zgartirish kiritish imkoniyatining cheklanganligi va boshqa shu kabi talablar o‘rnatilgan.

Ushbu talablarga to‘laqonli javob beradigan imtihon tizimi uchun sarmoya kiritgan istalgan tadbirkorlik sub’yekti litsenziya olish uchun ariza topshirishi mumkin. Bunda hech bir tadbirkorlik sub’yektiga cheklov yoki to‘siq yo‘qligini ma’lum qilamiz”, – deyiladi departament axborotida.

Eslatib o‘tamiz, bugun, 4 fevral kuni haydovchilikka nomzodlardan imtihon oluvchi O‘zbekistondagi ilk xususiy markaz faoliyat boshladi. “Toshkent imtihon markazi” poytaxtning Yangihayot tumanida joylashgan.

“Bu kabi markazlarda imtihonlar to‘liq inson omilidan xoli tarzda, avtomatlashtirilgan elektron tizim orqali qabul qilinadi. Bu esa haydovchilik guvohnomasini olish uchun nazariy va amaliy imtihonlarni topshirishi jarayonidagi korrupsion holatlarga chek qo‘yadi”, – dedi markaz taqdimotida qatnashgan ichki ishlar vaziri o‘rinbosari Bekmurod Abdullayev.

Guvohnoma olishdagi korrupsiyaga chek qo‘yilishi avtomaktablardagi ta’lim sifati oshishi va yo‘l-transport hodisalari soni kamayishiga olib keladi, deya ishonch bildirdi IIV rasmiysi.

U, shuningdek, imtihonlar inson omilidan xoli bo‘lgach, imtihondan yiqiluvchilar ko‘p bo‘lishidan ogohlantirib, haydovchilikka nomzodlarni yaxshiroq tayyorgarlik ko‘rishga chaqirdi.