21:46 / 06.02.2022
41727
Марокашда қудуққа тушиб кетган болани қутқариш учун барча оёққа турди. Аммо беш кун чуқурда қолган бола вафот этди

Марокашлик Райан исмли 5 яшар бола 1 февраль куни 32 метр чуқурликдаги қудуққа тушиб кетгани ортидан кенг кўламли қутқарув операцияси бошланди. Қудуқ тор бўлгани сабабли қутқарувчилар боланинг ёнигача бориш учун параллел туннель қазишди. Унгача эса Райанга сув, овқат ва кислород ниқоби етказиб берилди. Бироқ қутқарувчилар етиб борганида у жон таслим қилди. Қудуққа қулаётган вақтида олган жароҳатлари ҳамда ер остида узоқ вақт қолиб кетгани боланинг ўлимига сабаб бўлгани тахмин қилинмоқда.

Марокаш шимолида жойлашган Игран қишлоғида Райан исмли бола 1 февраль куни 32 метр чуқурликдаги қудуққа қулаб тушади. Тахминларга кўра, бола ўйнаб юрган вақтида чуқурга тушиб кетган. Райаннинг отаси маҳаллий оммавий ахборот воситаларига ўғлини бир неча соат давомида қидиргани, сўнгра унинг ер остига тушиб кетганини билиб қолгани ҳақида айтган.

Қутқарувчилар дастлаб болани қандай қутқариш мумкинлиги ҳақида бош қотиришди. Чунки чуқурлик тор бўлиб, у ердан катта ёшдаги одамнинг пастга тушиши имконсиз эди.

Содир бўлган воқеа Марокаш қироли Муҳаммад VI’ни ҳам бефарқ қолдирмади. У мутасадди идораларга болани қутқариш учун барча чораларни ишга солиш ҳақида топшириқ бериб, воқеалар ривожини шахсан ўзи узлуксиз кузатиб борди.

1 февраль куни кечки пайтда бошланган қутқарув ишлари кун-у тун давом этди. Дастлабки босқичда оғир техникалар ёрдамидан фойдаланилган бўлса, боланинг ёнигача етиб бориш учун қутқарувчилар 3 метр узунликдаги параллел туннель қазишди. Операциянинг охирги қисмини қўл кучи билан бажаришга тўғри келди.

Райан тушиб кетган қудуқ. Фото: Reuters

Мазкур ҳудуддаги тупроқнинг таркиби қутқарув операцияси қийинлашишига сабаб бўлди. Қум ва тош қатламларнинг бир-бири билан ўрин алмашавериши бир неча бор тупроқ ўпирилиши хавфини юзага келтиради. Қолаверса, қўл кучи ёрдамида қазилган туннель йўлидаги кўплаб тошлар чиққани қутқарув ишлари чўзилишига сабаб бўлади.

 Фото: Reuters

“Биз деярли кўзланган маррага етдик. Уч кун давомида танаффуссиз ишладик. Албатта, чарчоқ ўз кучини кўрсатяпти, лекин жамоадаги барча бошлаган ишини охиригача етказиш учун оёқда турибди”, деганди 4 февраль куни қутқарув операцияси раҳбарларидан бири Абдусалом Макудий.

Қутқарув операцияси иштирокчилари. Фото: AFP

Райан тушиб кетган қудуқ диаметри 45 сантиметр бўлиб, у тоза ҳавосиз бўғилиб қолмаслиги учун чуқурликка кислород ниқоби, шунингдек, сув, овқат ва камера туширилди. Камера орқали боланинг аҳволи мунтазам кузатиб борилди. Жараён ОАВда тўлиқ ёритиб борилди. Ушбу мавзу ижтимоий тармоқларда энг кўп муҳокама қилинган мавзулардан бирига айланади.

Маълум бўлишича, бола қудуққа қулаётиб, бошидан жиддий жароҳат олади. Бу чуқурликка туширилган камера орқали ҳам яққол кўринади. Шунингдек, айрим манбаларда унинг умуртқаси ҳам шикастлангани ҳақида сўз боради. Кузатув камерасидаги қайдлар ҳодисанинг дастлабки кунларида у ҳушида бўлгани, бироқ кейинчалик унинг ҳолатини аниқлаш имкони бўлмаганини кўрсатади. Видеотасвирларда унинг ёнбошлаб ётганинигина кўриш мумкин эди. Шу боис боланинг тирик қолгани, арқон ёрдамида унга туширилган сув ва овқатни истеъмол қилолгани аниқ эмас.

Фото: Getty Images

Қутқарув операцияси кун-у тун давом этди

“Мен бола билан гаплашишга муваффақ бўлдим. Мен ундан мени эшитяпсанми деб сўрадим, у эса жавоб қайтарди. Бир дақиқа давомида уни кузатиб турдим ва кислороддан фойдаланганини кўрдим”, деб айтган журналистларга кўнгиллилардан бири Имад Фаҳмий.

Воқеа жойида тез ёрдам машиналари ҳамда вертолёт навбатчиликда турди. Улар Райан қутқарилиши билан уни шифохонага зудлик билан етказишлари керак эди.

Игран қишлоғи аҳолиси тез ёрдам машинасини Райан Орамнинг жасади билан кутиб олди. Фото: AFP

5 февраль куни кечқурун бир гуруҳ қутқарувчилар қўлида бола билан туннелдан чиқиб келишди. Бироқ унинг ҳаётини сақлаб қолишнинг имкони бўлмади. Маълум бўлишича, шифокорлар болани туннелдаёқ текширувдан ўтказишган. Ер остида узоқ вақт давомида қолиб кетгани, шунингдек, бошидан олган жароҳати унинг ўлимига сабаб бўлгани айтилмоқда.

Боланинг ота-онаси қутқарув операцияси ўтказилаётган жойда. Фото: AP

Қирол Муҳаммад VI шахсан ўзи боланинг яқинларига ҳамдардлик билдирган.

“Қирол Муҳаммад VI ҳазрати олийлари марҳум Райаннинг ота-онасига қўнғироқ қилиб, таъзия изҳор қилди”, дейилади қироллик котибиятининг расмий хабарида.

Твиттерда #SaveRayan ҳэштэги трендга чиқди. “Манчестер Сити”нинг жазоирлик футболчиси Риёз Маҳрез ҳам Райанни қўллаб-қувватлади. Ижтимоий тармоқларда қутқарув жараёнига бағишланган кўплаб мэмлар тарқалди.

Top