Prezident Markaziy bankning Samarqand viloyati bosh boshqarmasi rahbarini ishdan olish bo‘yicha topshiriq berdi

Samarqand xalqaro aeroportining yangi terminalida prezident Shavkat Mirziyoyev ishtirokida viloyat faollari yig‘ilishi bo‘lib o‘tmoqda.

Yig‘ilish tanqidiy ruhda boshlangan. Banklarda korrupsiya evaziga kredit berish holatlari ko‘pligi hamda qaytarilmayotgan kreditlar hajmi yuqoriligi ta’kidlangan. «Milliy bank», «Xalq banki» va «Asaka bank»dagi holatlar bo‘yicha jinoiy ish ochilishi aytilgan.

«Biz islohotlar qilyapmiz. Odamlar hayotini yaxshilash uchun qarorlar chiqarilyapti. Xalqimiz oldida, xalqaro hamjamiyat oldida ochiqlik, erkinlikni ta’minlash uchun harakatdamiz. Odamlarni rozi qilish haqida gapirib turganimda rahbarlarning o‘zini o‘ylab, nopok ishlar qilishiga yo‘l qo‘ymayman», deya prezidentning so‘zlarini keltiradi «Mikrofon ko‘targan ayol» kanali.

Shavkat Mirziyoyev Markaziy bankning Samarqand viloyati bosh boshqarmasi boshlig‘i Otabek To‘xtayevni ishdan olish bo‘yicha topshiriq bergan. To‘xtayev bu lavozimda 2020 yilning aprelidan buyon ishlab kelayotgandi.

Shuningdek, viloyatning bir necha tuman hokimlari va sektor rahbarlari mansabni suiiste’mol qilgani, faoliyatida korrupsiya holatlari aniqlangani uchun ishdan olingan.