Asakadagi fermer xo‘jaligi binosidan topilgan 3 ta jasad: tafsilotlar

Guvohlarning ta’kidlashicha, 13 fevral kuni issiqxonada ishlash uchun chiqqan qo‘shnilar tunga borib, kabobxo‘rlik qilishni maqsad qilishadi. Fermer xo‘jaligi binosi oldida kaboblarni tayyorlab, sovuq qotishgach, bino ichiga isinish maqsadida kirishadi. Qo‘lbola usulda sandal tayyorlashadi va ko‘mir cho‘g‘idan foydalanishadi.

14 fevral kuni turmush o‘rtog‘i kelavermaganidan xavotir olgan Xadichaxon aya fermer xo‘jaligi binosiga yetib boradi. Bino ichida esa turmush o‘rtog‘i Muhammadrayim Hakimov va ikki nafar qo‘shnilarining jasadini ko‘radi.

“Hech qachon kechasi boshqa joyda qolmasdi. Tuni bilan kelavermagach, tongda oldiga chiqdim. Borib chaqirdim. Hech kim javob bermadi. Eshikni taqillatsam ham jimjitlik. Keyin eshikni ochib qarasam, turmush o‘rtog‘im va ikki nafar qo‘shnimizning jasadi yotardi. Uyimizda ham ko‘mir ishlatmaganmiz umuman”, - deydi Xadichaxon aya biz bilan suhbatda.

Xadichaxon ayaning baqirib yig‘laganini eshitgan o‘sha atrofdagi fuqarolar voqea joyiga kelishadi. Birozdan so‘ng esa favqulodda vaziyatlar bo‘limi va boshqa mutasaddilar yetib keladi.

“Ayol kishining yig‘lagan ovozini eshitib tushdik. Qarasak, shu yerda ishlab yuradigan uch nafar fuqaroning jasadini ko‘rdik”, - deydi guvohlardan biri.

Favqulodda vaziyatlar bo‘limi mutaxassisining ta’kidlashicha, hozirda tergovga qadar tekshiruv harakatlari olib borilmoqda.

FVB Asaka tuman bo‘limi inspektori Dadamurod Mamanazarov holat yuzasidan izoh berdi. Uning ta’kidlashicha, “14 fevral kuni taxminan soat 10:30 da Asaka tumani favqulodda vaziyatlar bo‘limi navbatchilik qismiga is gazi bilan zaharlanish holati bo‘yicha xabar kelib tushdi. Tezkor guruh bilan borganimizda “Chek” MFYda joylashgan “Asaka zotli chorva” fermer xo‘jaligi binosida 3 kishining jasadini topdik. Marhumlarning vafot etganligi yuzasidan sud-tibbiy ekspertizasi tayinlangan”.

Hozirda mazkur holat yuzasidan prokuratura tomonidan tergovga qadar tekshiruv harakatlari olib borilmoqda.

Abduvali Qurbonov, Kun.uz muxbiri
Tasvirchi va montaj ustasi: Azizbek Ismoilov