Chet davlatlarning harbiylashgan tuzilmalariga yollanish jinoiy javobgarlikka sabab bo‘ladi – Adliya vazirligi

Shuningdek, 28 fevral kuni Daryo.uz nashriga intervyu bergan O‘zbekistonning Ukrainadagi elchisi Alisher Kurmanov elchixonaga jangovar harakatlarda ishtirok etgan yoki jarohatlangan o‘zbeklar haqida ma’lumot kelib tushmaganini ta’kidladi.

“… O‘ylaymanki, bunaqa tashabbus bildirgan o‘zbeklar bo‘lmaydi ham. Yurtdoshlarimiz bu yerga boshqa maqsadda, asosan tirikchilik ilinjida kelishgan. Bunday ma’lumot bo‘lsa, ukrainaliklar bizga albatta xabar berishardi. Lekin ular ham bizga chiqmadi», - degan Alisher Kurmanov.

Avvalroq, 25 fevral kuni ijtimoiy tarmoqlarda o‘zbek tilida so‘zlovchi haydovchi bortida rossiyalik harbiylar mavjud bo‘lgan yuk avtomobilini Donbass hududiga haydab ketayotgani tasvirlangan video tarqalgan edi.

Nastoyashcheye Vremya xorijiy nashrlarga tayanib, Rossiya o‘zbekistonlik migrantlarni jangovar harakatlarga jalb qilayotgani haqida xabar bergan. Shuningdek, tarmoqlarda o‘zbekistonlik migrantlar UzMigrant sayti orqali Rossiya armiyasidan shu turdagi ishlarni topayotgani yozilgan. Migrantlarning harbiy harakatlar hududida ham ishlashga rozi bo‘lishiga tez muddatda Rossiya fuqaroligini olish yoki katta miqdordagi maosh sabab sifatida keltirilgan.

UzMigrant migrantlarga Rossiya armiyasidan ish topishda yordam bermayotganini, balki ular Markaziy Osiyolik o‘zbekzabon migrantlar uchun huquqiy axborot xizmati ekanligini ta’kidladi.

«Biz hech qaysi fuqarolarni (O‘zbekistonmi yoki boshqa davlat fuqarosi bo‘ladimi) Ukrainadagi jang harakatlariga qo‘shilishga da’vat qilmaymiz. Bizning hech qanday harbiy yoki yarim harbiy strukturalar bilan hamkorligimiz yo‘q», - deyiladi UzMigrant raddiyasida.

Ma’lumot uchun, O‘zbekiston Respublikasi Jinoyat kodeksida yollanish bilan bog‘liq huquqbuzarlik uchun ikkita modda doirasida javobgarlik belgilangan.

Xususan, Jinoyat kodeksining 154-moddasiga ko‘ra, nizolashayotgan davlatning fuqarosi yoki harbiy xizmatchisi hisoblanmagan yoki hech qanday davlat tomonidan qurolli kuchlar tarkibida rasmiy topshiriqni bajarish vakolati berilmagan shaxsning moddiy manfaatdorlik yoki boshqa biron shaxsiy manfaatni ko‘zlab, o‘zga davlat hududida yoki uning tarafini olib harbiy harakatlarda qatnashishi besh yildan o‘n yilgacha ozodlikdan mahrum qilish bilan jazolanadi.

Shuningdek, ushbu moddada yollanma shaxsni o‘qitish yoki moddiy ta’minot berish uchun ham javobgarlik mavjud.

Kodeksning 154-1-moddasida esa, xorijiy davlatlarning harbiylashgan organlariga xizmatga kirish uchun javobgarlik belgilangan.