Rishton tumanida g‘oyib bo‘lgan ona va qizlari qidiruvga berilgan. Kichik qizning jasadi Katta Farg‘ona kanalidan topildi

Farg‘ona viloyati Rishton tumanida oilaviy kelishmovchilik sabab ikki qizi bilan uydan chiqib ketgan ona qidirilmoqda. Kichik qizning jonsiz tanasi Katta Farg‘ona kanalidan topilgan. Bu haqda Farg‘ona viloyati FVB matbuot xizmati xabar berdi.

Qayd etilishicha, 21 fevral kuni Rishton tumani “Zohidon” MFY Qo‘rg‘oncha ko‘chasida istiqomat qiluvchi N.G. ismli ayol va uning ikki nafar qizi yashash xonadonidan chiqib ketib qaytib kelmagan.

Shu kuni oilaning kichik qizi X.Sh.ning jonsiz tanasi Bag‘dod tumani “Irg‘oli” MFY hududidan oqib o‘tuvchi Katta Farg‘ona kanalidan topilgan.

Katta Farg‘ona kanalida qidiruv ishlari 22 fevral kunidan buyon davom etmoqda. Unda Farg‘ona viloyati FVB Maxsus vazifalarni bajaruvchi mintaqaviy qutqaruv otryadi g‘avvos-qutqaruvchilari ham ishtirok etmoqda.

Ma’lumotlarga ko‘ra, qidirilayotgan ona va bolaning Katta Farg‘ona kanaliga o‘zini tashlab yuborganiga hech kim guvoh bo‘lmagan. Oiladagi kichik qizning jonsiz tanasi kanaldan topilishi ortidan ona va to‘ng‘ich qiz ham suvga cho‘kkanlikda gumon qilinib, qidiruv-qutqaruv ishlari olib borilmoqda.

Avvalroq, 22 yoshli ayol turmush o‘rtog‘i bilan janjallashib qolib, jahl ustida yashash xonadoniga yaqin bo‘lgan Katta Farg‘ona kanaliga o‘zini tashlab yuborganligi, uning jasadi uch kundan so‘ng topilgani haqida xabar berilgan edi.