Ozarboyjon aviakompaniyalari Rossiyaga parvozlarni to‘xtatadi

6 martdan boshlab Ozarboyjon aviakompaniyalari Rossiyaga parvozlarni to‘xtatadi. Bu haqda «Ozarboyjon havo yo‘llari» milliy aviakompaniyasi (AZAL) ma’lum qildi.

«Ertadan boshlab xalqaro parvozlarni amalga oshirishda yuzaga keladigan xatarlar sababli Rosaviatsiya tavsiyasiga muvofiq Rossiya aviakompaniyalarining Ozarboyjonga parvozlari noma’lum muddatga to‘xtatiladi. Bu o‘zgarish Ozarboyjon milliy aviatashuvchisiga ham taalluqli», — deyiladi xabarda.

Kompaniyaning bildirishicha, xalqaro parvozlarda to‘liq sug‘urta himoyasining mavjud emasligi «mamlakatlarimiz fuqarolari, aviakompaniyalari va boshqa yuridik shaxslariga xavf tug‘diradi».

«Yuqoridagilardan kelib chiqib, «Ozarboyjon havo yo‘llari» va Buta Airways 6 martdan boshlab Rossiya Federatsiyasining barcha shaharlariga parvozlarni vaqtinchalik to‘xtatadi», — deb ma’lum qilgan aviakompaniya.

Bekor qilingan reyslar yo‘lovchilari parvoz muddatini o‘zgartirishlari yoki chipta uchun to‘langan pullarini qaytarib olishlari mumkinligi aytilgan.