O‘zbekistonda 2022 yil mart oyi uchun ilgari kuzatilmagan darajada yomg‘ir yog‘di

Gidrometeorologiya xizmati markazi ma’lumotiga ko‘ra, 2003, 2012 va 2021 yillarning mart oylarida ham juda yomg‘irli ob-havo bo‘lgan, ammo bu yilgi kabi jadal va davomiyligi uzoq muddatli yomg‘irlar ilgari kuzatilmagan.

Shimoliy hududlardan tashqari, respublikaning katta qismida yog‘ingarchilik miqdori oylik me’yordan sezilarli darajada ko‘p bo‘lgan.

Jadal yomg‘irning davomiyligi ham anomal bo‘lib, 5 martdan beri har kuni biroz tanaffus bilan yomg‘ir yog‘gan.

Eng kuchli yomg‘ir 11-15 mart oralig‘ida kuzatilgan. Shu kunlari respublikaning ayrim joylarida 25-40 mm, ba’zi tog‘li hududlarda 50-60 mm gacha yog‘ingarchilik bo‘lgan.

18 martdan so‘ng yog‘ingarchilik 2-4 kunga tanaffus qilishi kutilmoqda. Mart oyining oxirigacha kuchli va uzoq muddatli yomg‘ir yog‘ishi kutilmayapti.

 Iqlimshunos olimlar fikricha, global isish yog‘ingarchilik ko‘payishiga olib kelmaydi. Biroq ular ekstremal ob-havo hodisalarining ko‘payishiga, shu jumladan, anomal quruq yoki anomal nam davrlarning takroriyligi ko‘payishiga olib keladi. Joriy yilning mart oyi buning yorqin tasdig‘idir.