Navoiyda tadbirkorning katta miqdordagi pulini qo‘lga kiritmoqchi bo‘lgan shaxslar ushlandi

Bosh prokuratura huzuridagi Iqtisodiy jinoyatlarga qarshi kurashish departamentining xabar berishicha, D.N. va S.Ya. “N.F.” MChJ rahbari N.ning ishonchiga kirib, ko‘p qavatli turar joy qurish uchun boshqa bir MChJga ajratilgan 2 ga yer maydonini “N.F.” MChJ nomiga rasmiylashtirib berish evaziga 140 000 AQSh dollari talab qilishgan. Firibgarlar kelishilgan puldan 10 000 AQSh dollarini olgan vaqtida departament hamda DXXning Navoiy viloyati boshqarmalari tomonidan o‘tkazilgan tezkor tadbirda qo‘lga olingan. Tezkor tadbir davom ettirilib, ularning sherigi O.R. ham ashyoviy dalillar bilan ushlangan.

Holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.