Uy-joy mulkdorlari shirkati 1,6 mlrd so‘m mablag‘ni talon-toroj qilgan

Aniqlangan qonunbuzarliklar qurilish-ta’mirlash ishlar hajmiga qo‘shib yozish, kredit mablag‘larini bemaqsad ishlatish, majburiy badaldan tushgan mablag‘larni talon-toroj qilish bilan bog‘liq.

Aholining murojaatlariga asosan, Uy-joy kommunal xizmat ko‘rsatish vazirligi huzuridagi Uy-joy fondi inspeksiyasi tomonidan qator uy-joy mulkdorlari shirkati faoliyati o‘rganilgan. Natijada, 20 ta uy-joy mulkdorlari shirkati tomonidan 37 ta holatda 1,6 mlrd so‘m mablag‘ maqsadsiz sarflangani yoki talon-toroj qilinganligi aniqlandi. Bu haqda uy-joy kommunal xizmat ko‘rsatish vazirligi xabar qilmoqda.

Qonunbuzilish holatlari eng ko‘p kuzatilgan yo‘nalishlar:

8 ta holatda qurilish-ta’mirlash ishlar hajmiga 451,8 mln so‘m qo‘shib yozilgan;
5 ta holatda 508,2 mln so‘m kredit mablag‘i maqsadsiz sarflangan yoki talon-toroj qilingan;
16 ta holatda mulkdorlardan yig‘ilgan 313,2 mln so‘m majburiy badal mablag‘i maqsadsiz ishlatilgan yoki talon-toroj qilingan;
8 ta holatda 351,9 mln so‘mga teng boshqa huquqbuzarlik va kamchiliklarga yo‘l qo‘yilgan.

Rasmiy xabarga ko‘ra, holat yuzasidan tegishli hujjatlar rasmiylashtirilib, huquqni muhofaza qilish organlariga taqdim etilgan.