Afg‘oniston «O‘zbekiston temiryo‘llari» bilan hamkorlikni to‘xtatishni rejalashtirayotgani haqidagi xabarlar rad etildi

12-14 aprel kunlari Termizda «O‘zbekiston temiryo‘llari» boshqaruv rahbarlarining Afg‘oniston temiryo‘llari boshqarmasi boshlig‘i Baxtulrahmon Sharafat boshchiligidagi delegatsiyasi bilan uchrashuvi bo‘lib o‘tdi.

«O‘zbekiston temiryo‘llari» matbuot xizmati xabar berishicha, uchrashuvda Afg‘oniston tomoni O‘zbekistonga ikki tomonlama munosabatlarni mustahkamlash, Afg‘onistonga/Afg‘onistondan yuk tashish hajmini oshirish bo‘yicha ko‘rilayotgan chora-tadbirlar va sa’y-harakatlar, shuningdek, yuklarni o‘z vaqtida qayta ishlashda ko‘rsatilayotgan yordam uchun minnatdorchilik bildirgan.

Uchrashuvda, shuningdek, Afg‘oniston «O‘zbekiston temiryo‘llari» bilan hamkorlikni to‘xtatishni rejalashtirayotgani haqida OAVda tarqalgan xabarlarni rad etgan.

Qayd etilishicha, Afg‘oniston temiryo‘llari boshqarmasi raisi ikki tomonlama hamkorlikni mustahkamlash niyatida ekanligini ta’kidlagan.

Afg‘oniston tomoni «So‘g‘diyona-Trans» ShK («O‘zbekiston temiryo‘llari» AJga qarashli)ning «Hayraton – Mozori Sharif» temiryo‘l liniyasining ekspluatatsiyasi bo‘yicha 2021 yildan buyon amalga oshirib kelayotgan ishlaridan to‘liq mamnunligini bildirgan.

Muzokaralar davomida Mozori Sharif—Kobul—Peshovar temiryo‘li qurilishi loyihasini amalga oshirishni jadallashtirish masalasi ham muhokama qilingan.

Bundan avvalroq Afg‘onistondagi nashrlar «Tolibon» hukumati Hayraton — Mozori-Sharif temiryo‘li boshqaruvini o‘z qo‘liga olmoqchi ekanligi haqida xabar tarqatgandi. Xususan, Afg‘oniston temiryo‘llari boshqarmasi (ARA) mamlakat temiryo‘l vokzallarini qo‘shni davlatlar bilan ishlatish bo‘yicha shartnomalar Afg‘oniston manfaatlarini hisobga olmasdan tuzilgani, bu shartnomalarni qayta ko‘rib chiqish rejalashtirilayotganini ma’lum qilgandi.