2022 йилнинг биринчи чорагида Ўзбекистонга 9та давлатдан 10,4 минг тонна қорамол гўшти импорт қилинди. Бу ўтган йилнинг мос даврига нисбатан 79 фоизга кўп. Импорт гўштнинг 61 фоизи Беларус ҳиссасига тўғри келмоқда.
Фото: Kun.uz
Қорамол гўшти импорти 4,6 минг тоннага ошган. Бу ҳақда Давлат статистика қўмитаси маълумот берди.
Қўмита хабарига кўра, 2022 йилнинг январь-март ойларида Ўзбекистонга 9 та давлатдан қиймати 46,3 млн АҚШ долларига тенг бўлган 10,4 минг тонна қорамол гўшти импорт қилинган.
Қайд этилишича, қорамол гўшти импорти ўтган йилнинг мос даври билан солиштирилганда 4,6 минг тоннага ошган.
2022 йилнинг 3 ойида Ўзбекистон энг кўп қорамол гўштини импорт қилган давлатлар орасида Беларус етакчилик қилмоқда – 6,3 минг тонна.
Ушбу кўрсаткич қолган давлатлар кесимида қуйидагича кўриниш олди:
- Қозоғистон – 2,6 минг тонна;
- Бразилия – 571 тонна;
- Украина – 437,5 тонна.
Бундан олдин Ўзбекистонга озиқ-овқат маҳсулотлари асосан Қозоғистондан олиб кирилаётгани хабар берилганди.
